Nəvəsinə baxmaq istəməyən yaşlı insanlar boşanmağa başlayır
Dövlət Statistika Komitəsinin məlumatlarına görə, Azərbaycanda boşanmaların sayı 2021–2025-ci illərdə 17 191-dən 20 675-ə yüksəlib. Bu dövrdə xüsusilə 60 yaşdan yuxarı şəxslər arasında boşanmaların artması diqqət çəkir. Belə ki, 60 və daha yuxarı yaşda boşanan kişilərin sayı 563-dən 838-ə, qadınların sayı isə 293-dən 431-ə çatıb. Maraqlıdır ki, boşanmaların artması əsasən yeni qurulan ailələrin bir-birilərini tanımamaları ilə əlaqələndirilir. Bəs 60 yaşdan yuxarı insanları boşanmağa vadar edən nədir?
Sosioloq Əhməd Rəhmanov Crossmedia.az-a açıqlamasında bildirib ki, boşanmaların artmasının əsas səbəblərindən biri cəmiyyətdə mənəvi dəyərlərin zəifləməsi və bunun ailə münasibətlərində də özünü göstərməsidir:
“Digər mühüm problem insanların yaşadıqları cəmiyyətə və gələcəyə inamının azalmasıdır. Əvvəllər sosial vəziyyəti çətin olan insanların belə müəyyən yaşdan sonra işləyərək özünü təmin edə biləcəyinə və cəmiyyət tərəfindən dəstək görəcəyinə inam daha yüksək olub.Bu gün insanlarda həmin ümid yoxdur. Tərəflərdən birinin ayağı büdrəyən kimi ailədə çat yaranır. Nəticədə ailədaxili münasibətlər daha kövrək hala gəlir”.
Ə.Rəhmanov qeyd edib ki, ailələrdə yaşlı nəslin üzərinə düşən yük də artıb. Onun sözlərinə görə, uşaq bağçalarının kifayət qədər olmaması səbəbindən nənələr nəvələrin qayğısına qalmağa məcbur olur, bəzi yaşlı insanlar isə tək yaşamağa və ya pansionatlara üz tutmağa başlayırlar:
“Hazırda həm dövlət, həm də özəl qocalar evlərində yer çatışmazlığı müşahidə olunur. Onun fikrincə, bütün bunlar ailə münasibətlərinə və cəmiyyətin mənəvi strukturuna təsir edən amillərdəndir.Mənəvi dəyərlərimiz artıq ayaq altındadır. Ona görə də boşanmalar təkcə sosial problemdən daha çox psixoloji problemlər siyahısına çıxıb”.
Zərnigar Hüseynli
20:00 10.08.2026
Oxunuş sayı: 46
