Şahzadə Harridən sensasiyalı AÇIQLAMA — Çağırsalar...
Şahzadə Harri Britaniya ordusuna qayıtmağa hazır olduğunu açıqlayıb.
Crossmedia.az xəbər verir ki, Böyük Britaniya kral ailəsinin üzvü, Sasseks hersoqu şahzadə Harri Rusiya ilə mümkün münaqişə fonunda Avropanın müdafiəyə hazırlaşmalı olduğunu bildirib.
Lvov şəhərinə səfəri zamanı “The Telegraph” nəşrinin “Ukraine: The Latest” podkastına müsahibə verən Harri zərurət yaranacağı təqdirdə yenidən Britaniya Silahlı Qüvvələrində xidmət etməyə hazır olduğunu deyib.
“Əgər yenidən xidmətə çağırılsam və buna ehtiyac yaranarsa, ölkəmə, veteranlara və hazırda xidmətdə olan hərbçilərə qoşularaq xidmət etməyə 100 faiz hazıram”, – deyə o bildirib.
Şahzadə Avropa ölkələrini təhlükəsizlik məsələlərinə daha ciddi yanaşmağa çağırıb. Onun sözlərinə görə, Ukraynanın müharibə təcrübəsindən bütün dünya üçün öyrəniləsi çox şey var.
Harri ABŞ Prezidenti Donald Trampın Ukraynaya münasibətdə siyasətini də tənqid edib. O, Amerika cəmiyyətinin Ukraynaya dəstəyinin yüksək olduğunu, lakin ABŞ administrasiyasının mövqeyinin bu ictimai rəydən fərqləndiyini bildirib.
Qeyd edək ki, şahzadə Harri Britaniya ordusunda 10 il xidmət edib və iki dəfə Əfqanıstanda hərbi əməliyyatlarda iştirak edib. O, hərbi xidmət zamanı “Apache” tipli döyüş helikopterinin pilotu olub. 2015-ci ildə ordudan ayrılıb.
23:33 18.11.2026
Oxunuş sayı: 43