ABŞ Rusiyaya xəbərdarlıq etdi: Gözləsəniz, şərtlər ağırlaşa bilər
ABŞ Prezidenti Donald Trampın xüsusi nümayəndələri Stiv Uitkoff və Cared Kuşner Rusiyanı Ukrayna ilə sülh sazişi üzrə razılaşmanı gecikdirməməyə çağırıblar. Onlar ABŞ Konqresində demokratların nəzarəti ələ almasının Moskva üçün daha əlverişsiz danışıqlar şəraiti yarada biləcəyini bildiriblər.
Crossmedia.az xəbər verir ki, bu barədə “The Kyiv Independent” nəşri məlumat yayıb.
Nəşrin məlumatına görə, amerikalı nümayəndələr Moskvaya hazırkı administrasiyanın müəyyən güzəştləri müzakirə etməyə hazır olduğu müddətdə razılaşma əldə etməyin vacibliyini çatdırıblar. Demokratların Konqresdə mövqelərini gücləndirməsi Ukraynaya hərbi yardımın artırılmasına və Kremlə təzyiqlərin güclənməsinə səbəb ola bilər.
Mənbənin sözlərinə görə, məhz bu arqument Rusiyanın sentyabrda danışıqları dayandırmaq qərarından sonra yenidən danışıqlar masasına qayıtmasına təsir göstərib.
Bununla belə, Rusiya Prezidenti Vladimir Putin Donbasın bütövlükdə Rusiyaya verilməsini tələb etməkdə davam edir.
Kremlin mümkün razılaşmanı qələbə kimi təqdim edə bilməsi üçün Vaşinqton Avropanın yeni təhlükəsizlik arxitekturası, o cümlədən Rusiyanın NATO ilə münasibətlərinin ayrıca müzakirəsini təklif edir. Ukraynalı rəsminin bildirdiyinə görə, bu məsələyə yalnız sülh sazişi imzalandıqdan sonra baxılması nəzərdə tutulur. Avropa nümayəndələri isə hələlik ABŞ-nin təşəbbüsünü dəstəkləmirlər.
Qeyd edək ki, ABŞ, Ukrayna və Avropa ölkələrinin nümayəndələrinin növbəti danışıqlarının noyabrın 19-da Berlində keçirilməsi gözlənilir.
22:23 18.11.2026
Oxunuş sayı: 46