Le Pen Zelenskinin Kiyev dəvətini rədd etdi: Fotosessiya üçün getməyəcəyəm
Fransada prezident seçkilərinin potensial favoritlərindən hesab olunan Marin Le Pen Ukrayna Prezidenti Volodimir Zelenskinin Kiyevə səfər dəvətini qəbul etməyib.
Crossmedia.az xəbər verir ki, bu barədə “Politico” nəşri məlumat yayıb.
Nəşrin yazdığına görə, Le Pen bazar ertəsi Ukraynanın Fransadakı səfiri ilə görüşdən sonra da Kiyevə getməkdən imtina edib. O, Zelenski ilə Parisdə və ya Brüsseldə görüşməyi təklif edib.
Le Penin partiyasından olan deputatın və onun müşavirlərindən birinin sözlərinə görə, siyasətçi Ukraynaya səfəri mənasız siyasi nümayiş hesab edir. Müşavir bildirib ki, Le Pen yalnız fotosessiya üçün Ukraynaya getmək istəmir.
“Politico”nun məlumatına əsasən, görüş hazırda tərəflərdən heç biri üçün prioritet hesab olunmur.
Le Pen Kiyevə yeni və genişmiqyaslı maliyyə yardımının ayrılmasının əleyhinə çıxsa da, Avropa İttifaqının əvvəlcədən razılaşdırdığı 90 milyard avroluq krediti yenidən nəzərdən keçirmək niyyətində deyil.
Fransa Prezidenti Emmanuel Makron isə Le Penin mövqeyini tənqid edib.
O bildirib ki, Ukraynanın resurslarını məhdudlaşdırmaq istəyənlər əslində ölkəni ədalətsiz sülhə məcbur etməyə çalışırlar. Makronun fikrincə, belə yanaşma Ukraynanı daim müdafiəsiz vəziyyətdə saxlayacaq və gələcək müharibənin zəminini yaradacaq.
Fransa prezidenti bu mövqeyi məğlubiyyətçilik ruhu kimi qiymətləndirib və bunun Fransanın siyasəti ola bilməyəcəyini vurğulayıb.
19:06 18.11.2026
Oxunuş sayı: 36