Alimləri heyrətləndirən dəniz canlısı: Başının içi görünür
Sakit okeanın dərinliklərində yaşayan və şəffaf baş quruluşu ilə seçilən nadir balıq alimlər tərəfindən 4K kamera ilə lentə alınıb.
Crossmedia.az xəbər verir ki, bu barədə “ScienceDaily” nəşri Monterey Bay Akvarium Tədqiqat İnstitutunun məlumatlarına istinadən yazıb.
Barreleye adlanan bu balıq okeanın təxminən 600 metr dərinliyində, Kaliforniya sahillərindən 90 kilometr aralıda müşahidə edilib.
Canlının ən qeyri-adi xüsusiyyəti başının yuxarı hissəsini örtən şəffaf toxuma və boruşəkilli gözləridir. Balığın gözləri əvvəlcə yuxarı istiqamətə baxır, ovunu müəyyən etdikdən sonra isə hərəkət edərək irəliyə yönəlir. Şəffaf örtük isə gözlərini qoruyur.
Alimlər nadir balığı təxminən 20 dəqiqə müşahidə edə biliblər. Onun görüntüləri xüsusi sualtı robotun 4K kamerası vasitəsilə qeydə alınıb.
MBARI tədqiqatçıları bildiriblər ki, institutun təxminən 40 illik fəaliyyəti və 7 min sualtı robot dalışı ərzində bu balıqla cəmi 11 dəfə qarşılaşıblar.
Tədqiqatçılar hesab edirlər ki, belə müşahidələr okeanın dərinliklərində yaşayan canlıların qeyri-adi uyğunlaşma mexanizmlərini daha yaxşı anlamağa kömək edir.
20:14 18.11.2026
Oxunuş sayı: 31