Avropa İttifaqından Rusiyaya qarşı yeni addım: Xüsusi sanksiya ofisi yaradıldı
Avropa Komissiyası əsasən Rusiya və Belarusa qarşı fəaliyyət göstərəcək xüsusi Sanksiyalar Ofisi yaradıb.
Crossmedia.az xəbər verir ki, bu barədə Avropa Komissiyasının mətbuat xidməti məlumat yayıb.
Yeni qurumun əsas məqsədi sanksiyaların hazırlanmasından tətbiqinə, eləcə də onlardan yayınma hallarına qarşı mübarizəyə qədər bütün proseslər üzrə Avropa Komissiyasının təcrübəsini bir araya gətirməkdir.
Ofis, həmçinin Avropa İttifaqına üzv olan və olmayan, qurumun sanksiya siyasətinə qoşulmaq istəyən ölkələrə müxtəlif sanksiya mexanizmlərinin tətbiqi ilə bağlı məsləhətlər verəcək.
Avropa Komissiyasının məlumatına görə, yeni strukturun fəaliyyəti əsasən Rusiya və Belarusa, daha az dərəcədə isə İran, Şimali Koreya və Suriyaya yönələcək. Bundan başqa, beynəlxalq cinayətkar və terror təşkilatları da qurumun fəaliyyət dairəsinə daxil edilib.
Qeyd edək ki, yeni ofis Aİ-nin diplomatik xidmətinin rəhbəri Kaya Kallasın tabeliyində olmayacaq. O, Avropa Komissiyasının maliyyə xidmətləri, əmanətlər və investisiyalar üzrə kuratorluq etdiyi baş direktorluğun strukturuna daxil edilib.
19:25 18.11.2026
Oxunuş sayı: 40