“Yüksəliş” qalibi: Müsabiqə insanın öz bacarıqlarına kənardan baxmasına da kömək edir- MÜSAHİBƏ
Artıq bir neçə ildir təşkil olunan “Yüksəliş” müsabiqəsi Azərbaycanda ciddi maraq doğurur. Müsabiqənin qaliblərindən bir çoxunun bu gün yüksək vəzifələrdə çalışması da layihənin kadrların seçilməsi və idarəetmə potensialının üzə çıxarılması baxımından əhəmiyyətini göstərir. Təkcə bu fakt onu deməyə əsas verir ki, “Yüksəliş” idarəetmə prosesində mühüm rol oynamaqla yanaşı, etibarlı və bacarıqlı kadrların müəyyənləşdirilməsinə də töhfə verir.
Crossmedia.az məsələnin aktuallığını nəzərə alaraq, “Yüksəliş hekayəsi” rubrikası çərçivəsində müsabiqə qalibləri ilə silsilə müsahibələri davam etdirir.
III “Yüksəliş” müsabiqəsinin qaliblərindən biri, İqtisadi Zonaların İnkişafı Agentliyi İdarə Heyəti sədrinin müavini Tural Abdullazadə ilə müsahibəni təqdim edirik:
- Sizin uğur yolunuzda “Yüksəliş” müsabiqəsinin rolu nə oldu və bu proses şəxsiyyətinizdə hansı əsas dönüş nöqtələrini yaratdı?
- “Yüksəliş”lə bağlı təcrübəm birinci müsabiqədə finalçı olmaqdan üçüncü müsabiqədə qalib gəlməyə qədər uzanır. Amma bu münasibət üç iştirakla yekunlaşmayıb. Sonrakı görüşlər, təşkil olunan tədbirlərdə iştirak, yeni tanışlıqlar və müxtəlif sahələrdə çalışan insanlarla ünsiyyət mənim üçün öyrənmək və inkişaf etmək imkanlarını davam etdirib. Bu baxımdan mentorluq proqramının da xüsusi əhəmiyyəti var. Təcrübəli rəhbərlərlə fikir mübadiləsi aparmaq, onların məsələlərə yanaşmasını və qərarlarının arxasındakı məntiqi anlamaq insanın idarəçiliyə baxışını genişləndirir. Öz təcrübəni fərqli baxışlarla müqayisə etmək, suallarına başqa perspektivdən baxmaq inkişaf üçün dəyərli imkandır. Müsabiqə insanın öz bacarıqlarına kənardan baxmasına da kömək edir. Gündəlik işdə müəyyən təcrübə qazanır, öz yanaşmalarımıza alışırıq. Tamamilə fərqli mühitə düşəndə isə həm güclü tərəflərimizi, həm də inkişaf etdirməli olduğumuz cəhətləri daha aydın görürük. Mənim üçün əsas dəyişiklik özümə inamla yanaşı, öz yanaşmalarımı sorğulamağın da vacibliyini anlamaq oldu. Qalib gəlmək bütün cavabları bildiyin mənasına gəlmir. Əksinə, öyrənməli olduğun nə qədər çox şeyin olduğunu daha yaxşı görürsən.
- Bu müsabiqədə iştirak edərkən qarşılaşdığınız ən çətin mərhələ hansı idi və siz bu çətinliyi hansı strategiya ilə aşdınız?
- Mənim təcrübəmdə çətinliyi yalnız müsabiqənin konkret mərhələsi ilə məhdudlaşdırmaq olmaz. Birinci müsabiqədə finala çatmışdım, amma qalib olmamışdım. İkinci iştirakım da qələbə ilə nəticələnmədi. Belə vəziyyətdə yenidən iştirak etmək əvvəlki nəticələrinə münasibətini müəyyənləşdirməyi tələb edir. Burada mənim üçün əsas yanaşma diqqəti dəyişə biləcəyim məsələlərə yönəltmək idi: nəyi daha yaxşı edə bilərəm, hansı bacarığımı inkişaf etdirməliyəm, fərqli situasiyalarda necə davranıram? Əvvəlki nəticəyə ilişib qalmaq əvəzinə, ondan növbəti iştirak üçün nəticə çıxarmaq daha faydalıdır. Üçüncü cəhddə qazandığım qələbə də mənə göstərdi ki, davamlılıqla yanaşı, hər dəfə öz yanaşmana yenidən baxmaq vacibdir. Eyni addımları təkrarlayıb fərqli nəticə gözləmək kifayət etmir.
- Qələbənizi yalnız fərdi nailiyyət kimi deyil, həm də cəmiyyət üçün bir məsuliyyət kimi necə dəyərləndirirsiniz?
- Qələbə, təbii ki, fərdi sevinc və qürur hissi yaradır. Bununla yanaşı, sənə göstərilən etimadı da hiss edirsən. Artıq insanlardan müəyyən gözləntilər yaranır və özün də gördüyün işə daha tələbkar yanaşırsan. Məncə, bu məsuliyyət ilk növbədə gündəlik fəaliyyətdə özünü göstərməlidir. Üzərinə götürdüyün işi keyfiyyətlə yerinə yetirmək, qərarlarının başqalarına təsirini nəzərə almaq, vaxt və resurslardan düzgün istifadə etmək bunun bir hissəsidir. İctimai fayda bəzən bir problemin həllində, bir prosesin yaxşılaşdırılmasında və insanların işini asanlaşdıran qərarda yaranır. Mənim üçün qalib adını daşımaq həmin etimadı gördüyün işlə doğrultmağa çalışmaqdır.
- Liderlik anlayışını sizin üçün fərqləndirən əsas xüsusiyyətlər hansılardır və bu xüsusiyyətləri real həyatda necə tətbiq edirsiniz?
- Mənim üçün lider, ilk növbədə, qərar vermək məsuliyyətini üzərinə götürməyi bacaran və bundan çəkinməyən şəxsdir. Qərarın nəticələrini, onun gətirdiyi yükü daşımağa da hazır olmalıdır. Bəzən məsuliyyət haqqında danışmaq asandır, amma qərar vermək məqamında tərəddüdlər başlayır. Lideri fərqləndirən əsas cəhətlərdən biri məhz həmin anda qərar vermək əzmidir. Komandanı dinləmək, fərqli fikirləri eşitmək vacibdir. Amma liderin qərarı hər zaman komandanın istəyi ilə üst-üstə düşməyə bilər. Uzunmüddətli nəticə üçün bəzən çətin və insanların həmin anda qəbul etmək istəmədiyi addımlar lazım olur. Belə hallarda lider qərarının səbəbini izah etməyi, onu həyata keçirməyi və nəticəsinə görə məsuliyyət daşımağı bacarmalıdır. Bu, öz fikrində israr etmək demək deyil. Lider səhv qərar vermək ehtimalını qəbul edir, səhvi gördükdə onu düzəldir və təkrarlamamaq üçün təcrübəsindən nəticə çıxarır. İşə yanaşmamda da dinləməyi, qərar verməyi və nəticəni izləməyi bir-birindən ayrılmaz hesab edirəm.
- Gənclərə və gələcək iştirakçılara tövsiyə olaraq, bu müsabiqəyə hazırlaşarkən hansı bacarıqların inkişafını vacib hesab edirsiniz?
- “Yüksəliş”in güclü tərəflərindən biri sınaq və tapşırıqların əhatəli hazırlanmasıdır. Fərqli sektorlardan situasiyaların təqdim olunması iştirakçılara müxtəlif bacarıqlarını göstərmək imkanı verir. Bu yanaşmanı uğurlu hesab edirəm, çünki idarəçilikdə də insan yalnız öz ixtisasına aid məsələlərlə qarşılaşmır. Yeni vəziyyəti anlamaq, fərqli məlumatları əlaqələndirmək və əsaslandırılmış qərara gəlmək lazım olur. Buna görə gələcək iştirakçılara ilk növbədə analitik düşüncələrini inkişaf etdirməyi tövsiyə edərdim. Vəziyyəti düzgün qiymətləndirmək, əsas problemi müəyyənləşdirmək, vacib məlumatı ikinci dərəcəli detallardan ayırmaq və mövcud imkanlar daxilində optimal həll tapmaq önəmlidir. Sonra isə həmin həlli komandaya aydın və əsaslandırılmış şəkildə təqdim etməyi bacarmalısan. Yaxşı fikir irəli sürmək qədər, onun məntiqini başqalarına çatdırmaq da vacibdir. Hazırlıq zamanı müxtəlif sahələrə maraq göstərmək, tanış olmadığınız problemlər üzərində düşünmək və fərqli yanaşmaları müqayisə etmək faydalıdır. Öz fikrinizi müdafiə etməklə yanaşı, daha əsaslı təklif qarşısında onu dəyişməyə açıq olmaq da komanda işinin vacib hissəsidir.
- Sizcə, müasir dövrdə uğurlu lider olmaq üçün ən vacib keyfiyyətlər hansılardır və Azərbaycan reallığında bu keyfiyyətlər necə formalaşdırılmalıdır?
- Qərar vermək əzmi və onun məsuliyyətini daşımaq mənim üçün yenə əsasdır. Bunun üzərinə yeniliyə açıqlığı, çevikliyi və daim inkişaf etmək istəyini əlavə edərdim. Texnologiyalar, iş üsulları, hətta insanların işdən və rəhbərdən gözləntiləri dəyişir. Bu gün iş həyatına daxil olan gənclərin lider anlayışı bizim alışdığımız anlayışdan fərqlənə bilər. Onlarla işləmək üçün düşüncə tərzlərini anlamağa çalışmalıyıq. Vaxtilə nəticə vermiş bir yanaşmanın bu gün də eyni şəkildə işləyəcəyini güman etmək olmaz. Bununla belə, bəzi keyfiyyətlər aktuallığını saxlayır: çətin anda qərar vermək, sözünün arxasında dayanmaq, ədalətli olmaq və nəticəyə görə məsuliyyəti başqasının üzərinə atmamaq. Azərbaycanda da bu keyfiyyətlərin inkişafı üçün insanlara real qərarvermə imkanı yaratmaq vacibdir. Hər addım üçün göstəriş gözlənilən mühitdə təşəbbüskarlıq çətin formalaşır. İnsan məsuliyyət götürməyi təcrübədə öyrənməli, verdiyi qərarın nəticəsini görməli və ondan dərs çıxarmalıdır.
- Gələcək planlarınız nədən ibarətdir və qazandığınız bu uğuru daha geniş ictimai faydaya necə çevirməyi düşünürsünüz?
- Gələcək planlarımı daha mürəkkəb məsələlərin həllində məsuliyyət götürmək və bunun üçün özümü inkişaf etdirmək ətrafında görürəm. Layihə idarəçiliyi, rəqəmsal transformasiya və təşkilati inkişaf mənim üçün maraqlı istiqamətlərdir. Bu sahələrdə bilik və təcrübəmi dərinləşdirərək gördüyüm işin nəticəsini yaxşılaşdırmaq istəyirəm. İş prosesində həll olunmamış bir məsələ çox insanın vaxtını ala, işi ləngidə və resurs itkisinə səbəb ola bilər. Həmin problemi düzgün müəyyənləşdirib davamlı həll qurmaq ilk baxışda kiçik görünən, amma təsiri geniş olan töhfədir. Mənim üçün önəmli olan gördüyüm işin məndən sonra da işləməsidir: proses bir nəfərin daimi müdaxiləsindən asılı qalmasın, məsuliyyət aydın olsun, nəticəni qiymətləndirmək mümkün olsun. Qazandığım uğurun dəyərini belə nəticələrə töhfə verməklə artırmaq istəyirəm.
19:50 18.11.2026
Oxunuş sayı: 53