Varşavadan nüvə silahı ilə bağlı mühüm addım – Danışıqlar aparılır
Polşa ABŞ-dən öz hərbi pilotlarının Amerika nüvə bombalarından istifadə qaydaları üzrə hazırlanmasını istəyib.
Crossmedia.az xəbər verir ki, “Gazeta Wyborcza” nəşrinin NATO-dakı mənbələrinə istinadən yaydığı məlumata görə, Varşava NATO-nun nüvə silahının birgə istifadəsini nəzərdə tutan “Nuclear Sharing” proqramına qoşulmaq üçün müraciət edib.
Bildirilib ki, müraciət hazırda ABŞ tərəfindən nəzərdən keçirilir və danışıqlarda irəliləyiş var. Təşəbbüsün təsdiqlənəcəyi təqdirdə Polşanın F-35 qırıcılarının pilotları Amerika nüvə aviabombalarından istifadə üzrə xüsusi hazırlıq keçə biləcəklər.
Məlumata görə, Polşanın bu proqramda iştirakı üçün əsas üstünlüklərindən biri ölkənin F-35A qırıcılarına malik olmasıdır. Bu təyyarələr Amerika istehsalı olan B61 nüvə bombalarını daşımaq imkanına malikdir.
Bununla belə, təşəbbüsün reallaşması üçün bir sıra siyasi və hüquqi məsələlərin həlli tələb olunur. Xüsusilə nüvə silahının yayılmaması haqqında müqavilənin müddəaları və NATO ilə Rusiya arasındakı münasibətlər bu prosesdə mühüm amillər hesab olunur.
Qeyd edək ki, Polşa tərəfinin açıqlamalarına əsasən, nüvə bombalarının ölkə ərazisində yerləşdirilməsi hazırda nəzərdə tutulmur. Müzakirə olunan variantlardan biri pilotların müvafiq hazırlıq keçməsi və nüvə silahlarının Polşadan kənarda saxlanılmasıdır.
23:40 18.11.2026
Oxunuş sayı: 46