Putin hələ görüş başlamadan diplomatik üstünlük qazandı – BBC
Rusiya Prezidenti Vladimir Putin ABŞ Prezidenti Donald Tramp və Çin lideri Si Cinpinlə planlaşdırılan üçtərəfli görüş baş tutmasa belə, artıq diplomatik və imic baxımından üstünlük əldə edib.
Crossmedia.az xəbər verir ki, bu barədə BBC-nin Rusiya üzrə redaktoru Stiv Rozenberq təhlilində yazıb.
Müəllif xatırladıb ki, 2022-ci ildə Ukraynaya qarşı genişmiqyaslı müharibənin başlamasından sonra Qərb ölkələri Putini beynəlxalq arenada təcrid etməyə çalışırdı. Lakin indi Rusiya lideri ABŞ və Çin prezidentləri ilə eyni masa arxasında əyləşmək imkanı əldə edib.
Rozenberqin fikrincə, bu görüş Kremlə Qərbin Rusiyanı beynəlxalq təcrid vəziyyətində saxlamaq cəhdlərinin uğursuz olduğunu nümayiş etdirmək imkanı verir. Üstəlik, danışıqlarda Ukrayna və Avropa ölkələrinin iştirak etməməsi Kiyev və Avropa paytaxtlarında narahatlıq yaradır.
Bununla belə, jurnalist vurğulayır ki, diplomatik uğur hərbi qələbə demək deyil. Rusiya ordusu döyüş meydanında ciddi itkilər verməkdə davam edir. Krım körpüsünə endirilən son zərbə də müharibənin Kremlin ilkin planlarına uyğun getmədiyini göstərən amillərdən biri kimi qiymətləndirilir.
Rozenberqin qənaətinə görə, Şençjendəki görüş Putin üçün beynəlxalq səhnədə böyük görünürlük yarada bilər, lakin bu, Rusiyanı Ukraynaya qarşı müharibədə qələbəyə yaxınlaşdırmır.
22:49 18.11.2026
Oxunuş sayı: 30