Yeni “Yalta” təhlükəsi: Tramp, Si və Putin dünyanı bölüşə bilər?
Dünya ABŞ, Çin və Rusiyanın təsir dairələrinə bölünə bilər. Belə bir şəraitdə kiçik dövlətlər öz müstəqilliklərini və təhlükəsizliklərini qorumaq üçün birləşməyə məcbur qala bilərlər.
Crossmedia.az xəbər verir ki, bu barədə “The Economist” nəşrinin analitik materialında qeyd olunub.
Nəşrin qiymətləndirməsinə görə, Rusiya-Ukrayna müharibəsi, Çinin Tayvana qarşı təhdidləri və ABŞ Prezidenti Donald Tramp administrasiyasının beynəlxalq təşkilatlardan uzaqlaşması mövcud dünya nizamını dəyişdirir.
Məqalədə dünya siyasətinin gələcəyi ilə bağlı iki mümkün ssenari irəli sürülür. Birinci ssenariyə əsasən, beynəlxalq institutlar fəaliyyətini davam etdirəcək, lakin onların qlobal proseslərə təsir imkanları zəifləyəcək. İkinci ssenari isə böyük dövlətlərin digər ölkələrə öz şərtlərini açıq şəkildə diktə etdiyi yeni dünya düzəninin formalaşmasını nəzərdə tutur.
Bu fonda Kanada və Avropa İttifaqı orta gücə malik dövlətlər arasında əməkdaşlığı gücləndirməyə çalışır. Məqsəd Vaşinqton və Pekindən asılılığı azaltmaq, beynəlxalq münasibətlərdə daha müstəqil mövqe tutmaqdır.
“The Economist” mümkün ssenarilər arasında yeni “Yalta razılaşması” ehtimalını da istisna etmir. Belə bir razılaşmanın ABŞ Prezidenti Donald Tramp, Çin lideri Si Cinpin və Rusiya Prezidenti Vladimir Putin arasında əldə olunaraq dünyanın təsir dairələrinə bölünməsinə gətirib çıxara biləcəyi vurğulanır.
Nəşrin ehtimalına görə, bu ssenari Ukraynanın kapitulyasiyaya məcbur edilməsi, Tayvanın isə Çinin nəzarətinə keçməsi ilə nəticələnə bilər.
23:47 18.11.2026
Oxunuş sayı: 118