Qaragilə xərçəng hüceyrələrinin yayılmasını ləngidə bilən maddələr ehtiva edir
Qaragilənin tərkibindəki təbii birləşmələr bədxassəli şişlərin böyüməsini ləngidə və xərçəng hüceyrələrinin yayılmasına mane ola bilər. Lakin bu təsirlərin insanlarda təsdiqlənməsi üçün əlavə araşdırmalara ehtiyac var.
Crossmedia.az xəbər verir ki, bu nəticəyə alimlər əvvəlki elmi tədqiqatların nəticələrini təhlil etdikdən sonra gəliblər. İcmal “Food & Function” jurnalında dərc olunub.
Tədqiqatçılar qaragilənin onkoloji xəstəliklərin inkişafına təsirini araşdıran elmi işləri nəzərdən keçiriblər. Xüsusilə giləmeyvənin tərkibində olan antosianlar, flavanollar və fenol turşuları kimi təbii birləşmələrin xüsusiyyətlərinə diqqət yetirilib.
Məlum olub ki, bu maddələr şişlərin inkişafında iştirak edən hüceyrə mexanizmlərinə təsir göstərə bilər. Laboratoriya təcrübələrində qaragilənin tərkibindəki komponentlər xərçəng hüceyrələrinin çoxalmasını ləngidib, onların bölünmə prosesini pozub və təbii ölüm mexanizmini işə salıb.
Oxşar nəticələr süd vəzi, ağciyər, yumurtalıq və bağırsaq xərçəngi hüceyrələri üzərində aparılan təcrübələrdə də müşahidə olunub. Heyvanlar üzərindəki sınaqlar isə bəzi qaragilə komponentlərinin şişlərin böyüməsini və yayılmasını, eləcə də xərçəng hüceyrələrini qidalandıran yeni qan damarlarının yaranmasını azalda biləcəyini göstərib.
Tədqiqat müəllifləri hesab edirlər ki, qaragilənin tərkibindəki birləşmələr gələcəkdə onkoloji xəstəliklərin profilaktikası və əlavə müalicəsi üçün vasitələrin hazırlanmasında perspektivli ola bilər. Bununla belə, qaragilə yeməyin insanlarda xərçəngin qarşısını aldığına və ya onu müalicə etdiyinə dair hələlik elmi sübut yoxdur.
08:50 12.11.2026
Oxunuş sayı: 39
