Bu idman süd vəzi xərçəngindən sağalan qadınlarda yorğunluğu azalda bilər
Ənənəvi Çin gimnastikası olan taytszitsyuan süd vəzi xərçəngindən müalicə alan qadınlarda çiyin oynaqlarının hərəkətliliyini yaxşılaşdıra və fiziki yorğunluğu azalda bilər.
Crossmedia.az xəbər verir ki, bu qənaətə çinli alimlər əvvəlki tədqiqatların nəticələrini təhlil etdikdən sonra gəliblər. Araşdırmanın nəticələri “Frontiers in Oncology” elmi jurnalında dərc olunub.
Tədqiqatçılar süd vəzi xərçəngindən müalicə keçmiş 1036 nəfərin iştirak etdiyi 12 klinik sınağın məlumatlarını araşdırıblar. İştirakçılardan 521-i taytszitsyuan məşqləri edib, digərləri isə nəzarət qruplarında yer alıblar.
Nəticələr göstərib ki, bu gimnastika çiyin oynaqlarının hərəkət imkanlarını və funksiyasını yaxşılaşdırmağa kömək edib. Xüsusilə xərçəng müalicəsindən sonra hərəkət məhdudiyyəti yaşayan qadınlar üçün bu təsir əhəmiyyətlidir. Məşqlərin fiziki yorğunluğu, eləcə də emosional tükənməni azaltmaq baxımından mümkün faydaları da müəyyən edilib.
Alimlər məşqlərin hansı müddət və tezlikdə daha təsirli olduğunu da araşdırıblar. Lakin fərqli məşq rejimləri arasında ciddi üstünlük aşkar edilməyib.
Tədqiqat müəllifləri taytszitsyuanın süd vəzi xərçəngindən sonrakı reabilitasiya prosesinə faydalı əlavə ola biləcəyini düşünürlər.
06:16 12.11.2026
Oxunuş sayı: 18
