Kələm turşusu neçə günə hazır olur? – Dəqiq müddət və hazır olduğunu göstərən əlamətlər
Kələm turşusunun dadlı və xırtıldayan alınması üçün onun düzgün müddətdə fermentasiya edilməsi vacibdir. Mətbəxdə tez-tez hazırlanan bu qış təamının nə vaxt hazır olduğunu müəyyənləşdirmək üçün bir neçə əsas əlamətə diqqət yetirmək lazımdır.
Crossmedia.az Ukraynanın UNIAN nəşrinin məlumatına istinadən xəbər verir ki, kələmin fermentasiya müddəti əsasən otaq temperaturundan və hazırlanmış məhsulun həcmindən asılıdır.
Belə ki, otaq temperaturu 20-22 dərəcə olduqda kələmin turşuması üçün üç gün kifayət edir. Temperatur təxminən 18 dərəcədirsə və ya kələm çox miqdarda hazırlanıbsa, proses 4-5 gün çəkə bilər. Dörd gün ərzində lazımi vəziyyətə çatmadıqda isə fermentasiya müddəti 5-7 günə qədər uzadıla bilər.
Məhsulun keyfiyyətini qorumaq üçün fermentasiyanın ikinci günündən etibarən kələmi gündə 2-3 dəfə taxta qaşıq və ya bıçaqla deşmək tövsiyə olunur. Bu üsul proses zamanı yaranan karbon qazının xaric olmasına kömək edir. Əks halda, hazır kələmdə acı dad yarana bilər.
Bundan başqa, kələmin daim öz şirəsinin altında qalmasına diqqət yetirilməlidir. Əgər tərəvəz tamamilə duzlu su ilə örtülməyibsə, üzərinə bir qədər təmiz su əlavə etmək olar. Bu, fermentasiyanın bərabər getməsinə kömək edir.
Kələm turşusunun hazır olub-olmadığını müəyyənləşdirmək üçün onun rənginə, köpüyün miqdarına və dadına baxmaq lazımdır. Kələm əvvəlkindən daha açıq rəng aldıqda, köpüklənmə demək olar ki, dayandıqda və xoş turş dad yarandıqda məhsulun hazır olduğu hesab edilir.
Hazır kələmi qapaqla bağlayaraq soyuducuya yerləşdirmək tövsiyə olunur. Bu, fermentasiya prosesini yavaşladır və məhsulun saxlanmasına imkan verir.
01:00 02.11.2026
Oxunuş sayı: 36
