Qərb imperializmi və xristian təəssübkeşliyi Azərbaycana qarşı media məkanında silaha çevrilir - Rəy
Azərbaycanın regional və beynəlxalq mövqeyinin güclənməsi fonunda ölkəyə yönələn media yanaşmaları ilə bağlı müzakirələr yenidən gündəmə gəlib. Prezident İlham Əliyev sentyabrın 15-də keçirdiyi görüşlərdən birində Azərbaycanın potensialını tam işə saldıqca Qərbdən ona qarşı “çirkin media kampaniyası” aparıldığını bildirib və ölkə haqqında “yalan, iftira, böhtanla dolu” yazıların dərc edildiyini qeyd edib. Dövlət başçısının bu açıqlaması Azərbaycanla Qərb mediası arasında münasibətlər, ölkə haqqında yayılan məlumatların məzmunu və belə materialların arxasında dayanan amillərlə bağlı sualları yenidən aktuallaşdırır. Eyni zamanda, Azərbaycanın artan regional rolu fonunda beynəlxalq media mühitində ölkə ilə bağlı formalaşan fərqli yanaşmaların səbəbləri diqqət çəkir.
Milli Məclisin deputatı Hikmət Babaoğlu Crossmedia.az-a açıqlamasında Qərb mediasında Azərbaycana qarşı yayımlanan materialların müxtəlif məqsədlər daşıdığını bildirib. Deputat qeyd edib ki, bu yanaşmanın Azərbaycanla bağlı reallıqların qiymətləndirilməsi baxımından müəyyən göstərici kimi nəzərdən keçirilməsi mümkündür: “Qərb mediasının Azərbaycana hücumları səbəbsiz təşkil olunmur və bu, bir növ Azərbaycan gerçəkliklərinin qiymətləndirilməsi üçün barometr rolunu oynayır. Azərbaycan güclənir, Qərb mediası Azərbaycana hücum edirsə, şər-böhtan kampaniyası aparırsa, Azərbaycan həqiqətlərini təhrif edirsə, demək ki, Azərbaycan növbəti bir uğura imza atıb və buna görə Qərb bundan narahatdır. Mənə elə gəlir ki, məsələnin aksiomatik tərəfi bundan ibarətdir”.
Deputatın sözlərinə görə, Azərbaycana qarşı aparılan kampaniyanın bir neçə məqsədi ola bilər: “Bu kampaniyanı aparanlar bir neçə məqsəd güdürlər. Onlardan biri Azərbaycanın yaratdığı yeni reallıqlar kontekstində öz maraqlarını, öz istismarçı mövqelərini Azərbaycana diktə etməkdən ibarətdir. İkincisi, mümkün qədər Ermənistan tərəfini gücləndirərək Azərbaycanı siyasi və diplomatik şantaja məruz qoymaqdır. Digər tərəfdən, bu, bir müsəlman ölkəsinin nə üçün bu qədər uğurlar əldə etdiyini qəbul edə bilməməklə də bağlıdır. Burada islamofobiya, Qərb imperializmi və xristian təəssübkeşliyi üç komponentdə birləşərək Azərbaycana qarşı media məkanında silaha çevrilir”.
Hikmət Babaoğlu Azərbaycan cəmiyyətinin bu cür kampaniyalara münasibətdə ayıq-sayıq olmasının vacibliyini qeyd edib: “Azərbaycan Prezidenti bir daha bu məsələyə toxunmaqla, həm də bu prosesin islamofobiyadan daha böyük bir məzmun kəsb etdiyini deyərkən, məhz bu mühüm komponentlərin hər birini nəzərdə tuturdu. Ona görə də Azərbaycan mətbuatı da, Azərbaycan cəmiyyəti də bütün bunları düzgün qiymətləndirməyi bacarmalıdır. Qərbin Azərbaycana müdaxilə imkanları yoxdur. Azərbaycan cəmiyyəti savadlı cəmiyyətdir və Qərbin belə hallarda nə istədiyini dərhal təsbit edir. Çünki Qərbin də, islamofob mərkəzlərin də artıq maskası 44 günlük müharibədə və ondan sonra davam edən altı ildə sürətlə gedən yolda tamamilə düşüb. Biz bu Qərb dairələrinin nə istədiyini artıq çox yaxşı başa düşürük”.
Nigar Xəlilli
16:00 16.09.2026
Oxunuş sayı: 110
