Hörmüz boğazında 300 kvadratkilometrdən böyük neft ləkəsi yaranıb
Hörmüz boğazında sahəsi 300 kvadratkilometrdən çox olan nəhəng neft ləkəsi yaranıb və neft İran sahillərinə çatıb.
Crossmedia.az xəbər verir ki, BBC-nin “BBC Verify” xidməti peyk görüntüləri və videolar əsasında sızmanın avqustun 3-də Oman sahillərində hücuma məruz qalan “Minoan Pioneer” quru yük gəmisindən qaynaqlana biləcəyini müəyyən edib.
“SkyTruth” eksperti dənizə axan neftin həcminin 380 min litrdən çox olduğunu qiymətləndirib. Neft artıq İranın Qeşm adasının sahillərinə çatıb. Ərazidə manqrov meşələri, mərcan rifləri, nəsli kəsilmək təhlükəsi ilə üzləşən dəniz tısbağalarının yuvalama sahələri və mühüm balıqçılıq zonaları yerləşir.
Ekoloqlar neft sızmasının yerli ekosistem üçün ciddi təhlükə yaratdığını, onun bir hissəsinin dənizin dibinə çökərək illərlə orada qala biləcəyini bildirirlər. BBC-yə danışan analitiklər gəminin böyük ehtimalla İran tərəfindən hücuma məruz qaldığını hesab edirlər, lakin Tehran zərbəyə görə məsuliyyəti üzərinə götürməyib.
13:54 15.08.2026
Oxunuş sayı: 54
