Kremlə “dostyana” mesaj: Müharibədə təhlükəli mərhələ başlayıb
Rusiyada böyük bizneslə hakimiyyət arasındakı münasibətlərin gələcək istiqaməti yenidən müzakirə mövzusuna çevrilib. Rusiyanın ən varlı sahibkarlarından Andrey Melnıçenkonun beynəlxalq mətbuatda yayımlanan məqaləsi təkcə iqtisadi deyil, siyasi baxımdan da diqqət çəkib. Məqalə oliqarxların Kremlə münasibətinin dəyişməsi, yoxsa yeni geosiyasi reallıqlara uyğunlaşması ilə bağlı sualları yenidən gündəmə gətirib. Bu fonda Melnıçenkonun səsləndirdiyi fikirlər Rusiya biznes elitasının gələcəyə baxışı ilə bağlı müxtəlif şərhlərə səbəb olub.
Politoloq Elçin Xalidbəyli Crossmedia.az-a açıqlamasında bildirib ki, Rusiya-Ukrayna müharibəsinin gedişi fonunda Rusiyada siyasi və iqtisadi risklər getdikcə artır, bu isə ölkənin biznes mühitinə də ciddi təsir göstərir.
Politoloqun fikrincə, Ukraynanın hərbi əməliyyatları Rusiya ərazisinin dərinliklərinə daşıması yeni reallıq yaradıb:
"Rəsmi Kiyev müharibəni artıq Rusiyanın dərinliklərinə qədər daşımağa nail olub. Hazırda döyüşlərin təsiri Rusiya ərazisində də hiss olunur. Belə şəraitdə biznes sektorunun normal fəaliyyəti üçün vacib olan sabitlik və təhlükəsizlik zəifləyir. Yaranmış vəziyyət iri biznes nümayəndələri arasında da narahatlıq yaradır. Biznes sektoru sülh və sabitlik şəraitində inkişaf edə bilir. Hazırkı vəziyyət isə iri biznes təmsilçiləri arasında müəyyən narazılıq və hərəkətlənmə əlamətlərinin yaranmasına səbəb olur".
E.Xalidbəyli hesab edir ki, bu narazılıqların yaxın perspektivdə hakimiyyət dəyişikliyinə səbəb olacağı inandırıcı görünmür:
"Rusiyada iri biznes tamamilə Kremlin nəzarəti altındadır. Bu ölkədə yalnız hakimiyyətin dəstəklədiyi şəxslər böyük bizneslə məşğul ola və oliqarxa çevrilə bilirlər. Buna görə də mövcud narazılıqların hakimiyyət dəyişikliyinə gətirib çıxaracağı ehtimalı yüksək deyil".
Onun sözlərinə görə, biznes dairələri üçün prioritet maliyyə sabitliyidir:
"Oliqarxlar kimin nəzarətində olmalarından asılı olmayaraq, ilk növbədə maliyyə maraqlarını düşünürlər. Gəlirləri təhlükə altına düşəndə isə narazılıqlarını müxtəlif formalarda ifadə etməyə çalışırlar. Melniçenkonun açıqlamaları da bu cür siqnallardan biri kimi qiymətləndirilə bilər. İri biznesin əsas mesajı müharibənin yaratdığı risklərin aradan qaldırılması ilə bağlıdır. Böyük ehtimalla Kremlə mesaj verilir ki, Ukrayna müharibəsi artıq Rusiya üçün təhlükəli mərhələyə daxil olub və dərin iqtisadi böhran başlamazdan əvvəl bu problemin həlli vacibdir. Böyük biznes sabitlik istəyir".
E.Xalidbəyli əlavə edib ki, Kremlin mövcud yanaşması hələlik dəyişmiş görünmür:
"Hazırda Kremlin Ukrayna müharibəsini danışıqlar yolu ilə başa çatdırmaq niyyətində olduğu müşahidə edilmir. Rusiya öz strateji məqsədlərinə çatmağa çalışır. Lakin dəyişən şərtlər fonunda bu siyasətin davam etdirilməsi ölkə üçün daha böyük risklər yaradır".
Nigar Xəlilli
12:00 05.08.2026
Oxunuş sayı: 60
