Seçkilərdən sonra yeni reallıq - Türkiyə-Ermənistan sərhədi açılır?
Azərbaycanla Ermənistan arasında mümkün sülh sazişinin regionda yaradacağı yeni siyasi reallıqlar fonunda Türkiyə-Ermənistan münasibətlərinin normallaşması məsələsi yenidən gündəmə gəlib.
Türkiyə Böyük Millət Məclisinin üzvü Şamil Ayrımın “Azərbaycanla Ermənistan arasında uzunmüddətli barış əldə olunarsa, Türkiyə-Ermənistan sərhədləri də açılacaq” fikri Cənubi Qafqazda geosiyasi balansın gələcəyi ilə bağlı mühüm müzakirələrə yol açıb.
Bu kontekstdə əsas sual ondan ibarətdir: tarixi gərginliklərə baxmayaraq, regionda sabitlik naminə Ankara ilə İrəvan arasında sərhədlərin açılması və ikitərəfli münasibətlərin bərpası real perspektivə çevrilə bilərmi?
Mövzu ilə bağlı Milli Məclisin deputatı Nəsib Məhəməliyev Crossmedia.az-a açıqlama verib:
"Hazırki vəziyyətdə Azərbaycan-Ermənistan münasibətləri normallaşma istiqamətində inkişaf edir. Azərbaycan, dəmir yolu vasitəsilə tranzit yüklərin Ermənistana daşınmasına şərait yaradır.
Neft məhsullarını bu ölkəyə ixrac edir. Hər iki ölkənin hökumətləri tərəfindən ixrac yönümlü malların siyahısı tutulur. Sərhədlərin delimitasiya prosesləri üzrə müştərək komissiya işləyir, vətəndaş cəmiyyətlərini təmsil edən qeyri-hökumət təşkilatları qarşılıqlı səfərlər təşkil edir və s.
Münasibətlərin daha da dərinləşməsi, Ermənistandan asılıdır. Daha doğrusu, bu ilin iyun ayının 7-də keçiriləcək parlament seçkilərinin nəticələrindən. Aydındır ki, Paşinyan hakimiyyətinə müxalif qüvvələrin siyasi mövqeyi indiki hakimiyyətlə daban dabana ziddiyət təşkil edir.
Onların Rusiyayönümlü mövqeyi, münasibətlərdə ciddi dəyişikliklərə səbəb ola bilər. Hesab edirəm ki, erməni xalqı daşnak-millətçi kəsimə növbəti dəfə qapının arxasını göstərəcək. Qarşıdurmaya yox, sülhə səs verəcək".
Deputat qeyd edib ki, Türkiyə ilə sərhədlərin açılması məsələsinə gəldikdə isə, qardaş ölkə Ermənistana yönəlik siyasətində, mütləq şəkildə Azərbaycanın maraqlarını nəzərə alır:
"Hər zaman belə olub və gələcəkdə də belə olacaq. Düşünürəm ki, parlament seçkilərindən sonra qonşu ölkənin konstitusiyasında müvafiq dəyişikliklər baş verəcək və sülhyaratma proseslərinin sürətlənməsini, o cümlədən Türkiyə-Ermənistan sərhədlərinin açılmasını görəcəyik".
Ayhan
11:00 11.04.2026
Oxunuş sayı: 939
