Hakimiyyət uğrunda açıq mübarizə: Ermənistanın gələcəyini kim müəyyən edəcək?
Ermənistanda qarşıdan gələn seçkilər fonunda siyasi səhnədə gərginlik getdikcə artır. Hakimiyyət uğrunda mübarizə əsasən ölkənin hazırkı baş naziri Nikol Paşinyan ilə keçmiş prezident Robert Köçəryan arasında cəmlənib.
Bu qarşıdurma təkcə iki siyasi fiqurun rəqabəti deyil, həm də Ermənistanın gələcək siyasi kursu uğrunda mübarizə kimi qiymətləndirilir.Vurğulamaq yerinə düşər ki, tərəflər arasındakı fikir ayrılığı ölkənin daxili və xarici siyasətinə ciddi təsir göstərə bilər.
Siyasi elmlər üzrə fəlsəfə doktoru, politoloq Qalib Ağayev bu barədə Crossmedia.az-a danışıb. Onun sözlərinə görə, Ermənistanda qarşıdan gələn seçkilər fonunda siyasi mühit getdikcə daha da qütbləşir və bu prosesin mərkəzində Baş nazir Nikol Paşinyan ilə sabiq prezident Robert Köçəryan arasında dərinləşən qarşıdurma dayanır:
"Mövcud vəziyyət yalnız iki siyasi fiqurun rəqabəti kimi deyil, eyni zamanda Ermənistanın gələcək inkişaf trayektoriyasına dair fundamental seçim kimi qiymətləndirilə bilər. Paşinyan hakimiyyəti 2018-ci ildən sonra formalaşmış legitimlik bazasına və islahat gündəliyinə istinad edərək, siyasi diskursu əsasən korrupsiyaya qarşı mübarizə, institusional dəyişikliklər və Qərbyönümlü idarəetmə modelinə yönəltməyə çalışır. Lakin onun hakimiyyəti dövründə baş verən regional təhlükəsizlik böhranları, xüsusilə 2020-ci ildən sonrakı reallıqlar, iqtidarın zəif tərəfi kimi müxalifət tərəfindən sistemli şəkildə qabardılır. Digər tərəfdən, Köçəryan siyasi ritorikasını təhlükəsizlik, güclü dövlətçilik və ənənəvi geosiyasi balans üzərində qurur. Onun tərəfdarları Paşinyan hakimiyyətini strateji səhvlərdə, xüsusilə müdafiə və diplomatik sahədə uğursuzluqlarda ittiham edir. Bu isə seçici davranışında “sabitlik və təhlükəsizlik” ilə “islahat və dəyişiklik” arasında klassik dilemma yaradır. Mövcud qarşıdurmanın əsas xüsusiyyəti ondan ibarətdir ki, bu, təkcə fərdi siyasi ambisiyaların toqquşması deyil, həm də Ermənistan cəmiyyətində dərin ideoloji və psixoloji parçalanmanın göstəricisidir".
Q.Ağayev qeyd edib ki, bir tərəfdə dəyişiklik və modernləşmə istəyən elektorat, digər tərəfdə isə təhlükəsizlik prioritetlərini ön plana çəkən və daha sərt idarəetməyə meylli sosial qruplar dayanır:
"Ekspertlərin qiymətləndirməsinə görə, qarşıdan gələn seçkilər Ermənistan üçün dönüş nöqtəsi ola bilər. Seçkilərin nəticəsi ölkənin həm daxili siyasi sabitliyinə, həm də regionda formalaşan yeni güc balansında hansı mövqeni tutacağına birbaşa təsir göstərəcək".
10:00 02.04.2026
Oxunuş sayı: 63
