Azərbaycanla Ermənistan arasında normallaşma prosesi real, məntiqli və perspektivlidir - RƏY
Regionda uzun illər davam edən gərginlik və münaqişələrdən sonra Azərbaycan və Ermənistan arasında yeni bir dövrün başlanması müşahidə olunur. Tarixi sülh təşəbbüsləri və aparılan danışıqlar iki ölkə arasında əlaqələrin normallaşmasına, iqtisadi və sosial əməkdaşlığın inkişafına zəmin yaradır. Bu proses yalnız bölgədə sabitliyi gücləndirmir, həm də xalqlarımız üçün yeni perspektivlər açır. Tarixi addımlar atılaraq sülh və əməkdaşlıq istiqamətində mühüm nəticələr əldə edilir, bu isə gələcək nəsillər üçün dayanıqlı inkişafın əsasını qoyur.
Məsələ ilə bağlı Milli Məclisin deputatı Vüqar Rəhimzadə Crossmedia.az-la öz fikirlərini bölüşüb: "Azərbaycan 2020-ci il Vətən müharibəsində əldə etdiyi tarixi Qələbə ilə Cənubi Qafqazda yeni geosiyasi reallıqlar formalaşdırıb. Tarixi Zəfərimizdən üç il sonra rəşadətli Ordumuzun həyata keçirdiyi lokal antiterror tədbirləri nəticəsində ərazilərimiz separatçılardan təmizləndi, suverenliyimiz tam bərpa edildi. Dövlətimizin yaratdığı bu reallıqlar beynəlxalq hüququn prinsiplərinə əsaslanaraq regionda sülhün qurulması üçün yeni əsaslar formalaşdırdı. Regionda sülh gündəliyinin müəllifi olan Azərbaycanın həyata keçirdiyi məqsədyönlü və ardicli siyasət nəticəsində ötən il Vaşinqtonda sülh sazişi paraflandı. Qalib Azərbaycanın həyata keçirdiyi uğurlu və milli maraqlara əsaslanan siyasət həm Cənubi Qafqaz regionu, həm də daha geniş mənada Qlobal Cənub üçün tamamilə yeni imkanlar açır".
Deputat, həmçinin Azərbaycanla Ermənistan arasında müşahidə olunan normallaşma prosesi regionun siyasi arxitekturasında keyfiyyətcə yeni mərhələnin başlandığını göstərdiyini qeyd edib: "Bu proses təkcə iki ölkə arasında münasibətlərin bərpası deyil, eyni zamanda, daha geniş regional sabitlik və əməkdaşlıq üçün real imkanlar yaradır. Birbaşa siyasi dialoqun mövcudluğu da mühüm müsbət amildir. Hazırkı normallaşma mərhələsi praqmatik maraqlara əsaslanan yanaşma ilə seçilir. Prezident İlham Əliyev fevralın 4-də Birləşmiş Ərəb Əmirliklərinin Əbu-Dabi şəhərində Ermənistan Respublikasının Baş naziri Nikol Paşinyanla görüşündə tərəflər hər iki cəmiyyətin sülhün faydalarına real həyatda şahid olduqlarını qeyd ediblər. Onlar ikitərəfli ticarətin başlamasından və Azərbaycandan Ermənistana neft məhsullarının ixracının davam etməsindən, həmçinin üçüncü ölkələrdən Ermənistana taxıl və digər malların Azərbaycan ərazisindən tranzitinin həyata keçirilməsindən məmnun olduqlarını bildiriblər. Tərəflər ikitərəfli ticarət və iqtisadi əməkdaşlığı genişləndirmək üçün imkanları araşdırmağı davam etmək barədə razılığa gəliblər. Azərbaycan Prezidenti və Ermənistanın Baş naziri iki ölkə arasında sülhün və sabitliyin daha da möhkəmləndirilməsi istiqamətində səyləri davam etdirməyə hazır olduqlarını bir daha təsdiqləyib, ikitərəfli normallaşma prosesinə dəstək məqsədilə təmasları davam etdirmək barədə razılığa gəliblər.
Münasibətlərin normallaşmasının ən mühüm tərəflərindən biri iqtisadi rasionalıqdır. Kommunikasiyaların bərpası və tranzit imkanları həm Azərbaycan, həm Ermənistan, həm də üçüncü ölkələr üçün real iqtisadi faydalar vəd edir. Mövcud siyasi vəziyyət göstərir ki, Azərbaycanla Ermənistan arasında normallaşma prosesi real, məntiqli və perspektivlidir. Hələ həllini gözləyən məsələlər olsa da, əsas yol xəritəsi müəyyən edilib. Sülh və əməkdaşlıq Cənubi Qafqazı sabitlik, inkişaf və qarşılıqlı etimad üzərində qurulan bir regiona çevirəcək".
Elmir Heydərli
11:18 09.02.2026
Oxunuş sayı: 548
