Zəngəzur dəhlizinin reallaşmasında müəyyən ləngimələr var - POLİTOLOQ
Cənubi Qafqazda uzun illərdir davam edən mürəkkəb geosiyasi proseslər fonunda regional münasibətlərdə müşahidə olunan hər bir dəyişiklik diqqət mərkəzindədir. Xüsusilə Ermənistanın Azərbaycan və Türkiyə ilə əlaqələrinə dair səsləndirilən fikirlər bölgədə mümkün yeni siyasi konfiqurasiyalarla bağlı müzakirələri aktuallaşdırır. Rəsmi İrəvandan verilən son açıqlamalar da bu baxımdan maraq doğurur.
Belə ki, Ermənistan rəsmiləri İrəvan–Bakı və İrəvan–Ankara münasibətlərinin hazırkı dinamikasını müsbət qiymətləndirir, proseslərdə müəyyən irəliləyişlərin əldə olunduğunu bildirirlər. Bu yanaşma regionda normallaşma perspektivləri, qarşılıqlı münasibətlərin gələcək inkişaf istiqamətləri və mümkün nəticələr baxımından xüsusi əhəmiyyət kəsb edir.
Cənubi Qafqazda müşahidə olunan yeni dinamika bardə politoloq İlqar Vəlizadə Crossmedia.az-la öz fikirlərini bölüşüb: "Müsbət dinamika açıq şəkildə görünür. Artıq Azərbaycanla Ermənistan arasında ticarət mübadiləsi başlanıb, həmçinin Ermənistanla Türkiyə arasında İrəvan–İstanbul reyslərinin sayının artırılması qərara alınıb. Eyni zamanda, hər iki tərəfdən Ermənistana doğru gedən kommunikasiyalara baxış keçirilib, həm Ermənistan-Türkiyə, həm də Ermənistan-Azərbaycan sərhədlərində mövcud kommunikasiya xətləri qiymətləndirilib. Bu xətlərin bərpası ilə bağlı danışıqlar davam edir. Buna baxmayaraq, bəzi məsələlər hələ rəsmiləşdirilməyib; kommunikasiyaların tam açılması ilə bağlı yekun qərar qəbul olunmayıb. Zəngəzur dəhlizinin reallaşmasında müəyyən ləngimələr var ki, bu da razılaşmaların qısa müddətdə əldə edilməsinə mane olur. Ümumilikdə isə proses davam edir və ehtimal ki, Ermənistanda gözlənilən parlament seçkilərində indiki iqtidarın qalib gəlməsindən sonra bu məsələlər hüquqi və siyasi baxımdan formalaşacaq, lazımlı sənədlər imzalanacaq və razılaşmalar əldə olunacaq. Bu sülh prosesi Azərbaycan, Türkiyə və regional ictimaiyyət tərəfindən səbirsizliklə gözlənilir".
Elmir Heydərli
11:32 21.01.2026
Oxunuş sayı: 1557
