Ermənistanın Türkiyə ilə əlaqələrə ehtiyacı var - Açıqlama
Cənubi Qafqazda formalaşmaqda olan yeni geosiyasi və iqtisadi reallıqlar fonunda Ermənistan hökuməti Türkiyə ilə münasibətlərin normallaşdırılması və sərhədlərin açılması məsələsini ardıcıl şəkildə gündəmdə saxlayır. Rəsmi İrəvan bu addımı regional təcriddən çıxış, tranzit imkanlarının genişlənməsi və iqtisadi fəallığın artırılması baxımından mühüm fürsət kimi dəyərləndirir.
Hakimiyyət dairələrinin fikrincə, sərhədlərin açılması təkcə ticarət dövriyyəsinin artmasına deyil, eyni zamanda sərhədyanı bölgələrdə yeni infrastruktur layihələrinin – gömrük anbarları, terminallar və loqistika mərkəzlərinin yaradılmasına şərait yarada bilər. Bu isə Ermənistanın investorlar üçün daha cəlbedici ölkəyə çevrilməsi və dövlət-özəl sektor əməkdaşlığının genişlənməsi baxımından strateji əhəmiyyət daşıyır.
Bu haqda Crossmedia.az-a danışan politoloq, professor Qabil Hüseynli söyləyib ki, son zamanlar Türkiyə ilə Ermənistan arasında sərhəd gömrük məntəqələrinin açılması və azad gediş-gəlişin təmin olunması istiqamətində aparılan danışıqlar prosesi nəzərəçarpacaq dərəcədə sürətlənib: "Türkiyə hesab edir ki, Azərbaycanla Ermənistan arasında sülh müqaviləsinin bağlanması qaçılmazdır və Ermənistanın alternativ manevr imkanları məhduddur. Bu çərçivədə Ermənistanın referendum keçirməklə konstitusiyasında Azərbaycana qarşı mövcud ərazi iddialarını aradan qaldıracağı da gözlənilir. Belə olan halda, prosesin süni şəkildə uzadılmasının məqsədəuyğun olmadığı düşünülür. Hazırda Ermənistanın ehtiyac duyduğu türk malları əsasən İran və daha çox Gürcüstan üzərindən, vasitəçilər tərəfindən gətirilir və bu məhsullar erməni bazarına xeyli baha qiymətə çıxarılır. Sərhədlərin açılması isə, ilk növbədə, gediş-gəlişi asanlaşdıracaq, eyni zamanda Türkiyə məhsullarının Ermənistan bazarına daha ucuz qiymətlə daxil olmasına şərait yaradacaq. Bu, iki ölkə arasında münasibətlərin yumşalmasına və iqtisadi əlaqələrin canlanmasına səbəb ola bilər. Xüsusilə Türkiyənin sərhəd bölgələrində yaşayan əhalinin gömrük məntəqələrinin açılmasını səbirsizliklə gözlədiyi bildirilir. Onlar Ermənistan bazarına birbaşa çıxış əldə etməklə ticarət imkanlarını genişləndirməyi planlaşdırırlar. Bu prosesdə Ermənistan da müəyyən iqtisadi fayda əldə etsə də, əsas qazanan tərəfin Türkiyə olacağı şübhəsizdir. Türkiyənin zəngin sənaye və istehsal potensialı — xüsusilə tekstil, maşınqayırma və digər istehlak malları — Ermənistan bazarında geniş yer tuta bilər".
O, düşünür ki, hazırda Gürcüstan vasitəsilə baha qiymətə əldə edilən yüksək keyfiyyətli tekstil məhsullarının sərhədlər açıldıqdan sonra birbaşa Türkiyədən daha ucuz qiymətə alınması erməni istehlakçıları üçün olduqca sərfəli olacaq: "Bundan əlavə, Türkiyə üzərindən Avropa ölkələrinə çıxış imkanlarının artması da Ermənistan üçün əlavə logistik üstünlüklər yarada bilər. Ümumilikdə, sərhədlərin açılmasının həm Türkiyə, həm də Ermənistan üçün qarşılıqlı faydalı olacağı fikrindəyəm. Lakin paralel olaraq Ermənistanın Azərbaycanla sülh müqaviləsinin imzalanması prosesini sürətləndirməsi, xüsusilə ABŞ-də aparılan müzakirələr fonunda bu sənədin rəsmiləşdirilməsini gecikdirməməsi vacibdir. Ermənistan bəyan edir ki, seçkilərlə paralel referendum keçiriləcək, konstitusiyadakı Azərbaycana dair ərazi iddiaları aradan qaldırılacaq və bundan sonra həm Azərbaycanla, həm də region ölkələri ilə münasibətlər normallaşacaq. Beləliklə, hər iki tərəf prosesin gələcəyinə nikbin yanaşır və yaxın perspektivdə bu təşəbbüslərin reallaşacağını gözləyir".
Elmir Heydərli
10:31 15.01.2026
Oxunuş sayı: 2218
