Paşinyan sülh prosesinə niyə mane olur? - Səbəb budur
Ermənistanla münasibətlərin normallaşdırılması istiqamətində aparılan danışıqlarda son aylarda müşahidə olunan durğunluq regionda siyasi gündəmin əsas müzakirə mövzularından birinə çevrilib. Prosesin ləngiməsi xüsusilə ratifikasiya mərhələsinin uzanması ilə diqqət çəkir ki, bu da həm daxili, həm də regional siyasi amillərlə əlaqələndirilir.
"Ermənistanla Azərbaycan arasındakı, 6 ay öncə başlanan prossesdə bir az durğunluq yaşanır. Bu da təbiidir, çünki hazırda Ermənistanda əsas diqqətlər 6 aydan sonra keçiriləcək parlament seçkilərinə yönəlir".
Bu sözləri Crossmedia.az-a açıqlamasında AĞ Partiya sözçüsü, siyasi şərhçi Cavanşir Abbaslı deyib: "Doğrudur, bir il ərzində sənədin ratifikasiyası, təsdiqlənməsi nəzərdə tutulurdu. Artıq 6 ay keçib və təsdiqlənmə mərhələsi öz əksini tapmayıb. Bu da müəyyən qədər suallara yol açır və Azərbaycan tərəfdə müəyyən narahatlıqlar yaradır. Amma hesab edirəm ki, bütün bunların hamısı iyun ayında keçiriləcək parlament seçkiləri ilə bağlıdır. Çünki bu ratifikasiya mərhələsi baş tutarsa, yəni paraflanma məsələsi təsdiqlənərsə, bu Paşinyanın ölkə daxilində nüfuzuna bir qədər də zərbə ola bilər. Revanşist qüvvələrin əlini daha da gücləndirə bilər. Azərbaycan tərəf bunu çox yaxşı anlayır, həmçinin Türkiyə tərəfi də".
C.Abbaslı hesab edir ki, Azərbaycan tərəfinin səbr nümayiş etdirməsi təbii haldır: "Biz səbr nümayişimizi iyun ayına qədər davam etdirəcəyik. Çünki hazırda Azərbaycana heç bir halda Paşinyanın hakimiyyətdən uzaqlaşdırılması sərf etmir. Bunun üçün də Azərbaycan bu səbrini hələ ki, boğmaqla məşğuldur.
Doğrudur, Azərbaycanla Ermənistan arasında neft məsələsində çox ciddi yaxınlaşma müşahidə olundu. Azərbaycan tərəfinin tələb etdiyi bir şərt var. Bu şərt yerinə yetirilməlidir. Yerinə yetirilmədiyi surətdə Azərbaycanla Ermənistan arasındakı sülh sənədinin imzalanmasından söhbət gedə bilməz. Əsas şərt ondan ibarətdir ki, Ermənistan konstitusiyasında Azərbaycana qarşı yer alan ərazi iddiaları ləğv edilməlidir.
Bunun üçün də referendum keçirilməlidir. Referendum keçirilməsi də böyük proses tələb edir. Qarşıda da 6 ay qaldığını nəzərə alsaq, çox qısa müddət hesab olunur. Bu müddət içərisində referendum keçirib ərazi iddialarını Ermənistan konstitusiyasından çıxarmaq Paşinyanın uduzmasına yol aça bilər. Bu durğunluq, 8 avqustda imzalanmış sülh öncəsi paraflanma sənədinin təsdiqlənməsi mərhələsi iyun ayından sonra aradan qalxacaq və ondan sonra Azərbaycan öz qətiyyətini bir daha göstərəcək. Düşünürəm ki, bu işlərdən sonra Ermənistan böyük ehtimalla ilin ikinci yarısında referenduma gedəcək. Ərazi iddialarının konstitusiyasından çıxaracaq. Daha sonra Türkiyə ilə bağlı iddialarını aradan qaldıracaq".
Fatimə Məmmədova
10:00 15.01.2026
Oxunuş sayı: 2059
