Azərbaycan regionun aparıcı gücü kimi sülh zəmanətləri yaradır - Səməd Seyidov danışdı
Ermənistanın iqtisadiyyat naziri Gevork Papoyan bildirib ki, ölkəsi Azərbaycandan ümumi həcmi 7 600 ton olan neft məhsullarının idxalını gözləyir.
"2026-cı il yanvar 8-nə olan məlumata görə, Azərbaycan ərazisindən dəmir yolu vasitəsilə Ermənistana artıq 8 485 ton Rusiya taxılı çatıb. 4 103 ton taxıl, həmçinin 7 600 ton Azərbaycan neft məhsulları - 6 100 ton benzin, 1 500 ton dizel yanacağı yoldadır", - nazir yazıb.
O xatırladıb ki, 2025-ci ildə Azərbaycan ərazisindən dəmir yolu ilə Ermənistana 6 580 ton taxıl gətirilib ki, bunun da 1 000 tonu Qazaxıstan, 5 580 tonu isə Rusiya mənşəlidir, həmçinin 1 210 ton Azərbaycan benzini də çatdırılıb.
Nazir, həmçinin qeyd edib ki, Azərbaycan neft məhsullarının yeni partiyasının gəlməsi ilə əlaqədar Ermənistanda benzin qiymətlərinin aşağı düşməsi gözlənilir: "Artıq qeyd etdiyim kimi, benzin və dizel yanacağının qiymətlərinin əvvəlki ayın qiymətləri ilə müqayisədə litr üçün 80 drama (0,36 manat -red.) qədər azalması gözlənilir. Məmnuniyyətlə bildirirəm ki, bu inkişafla əlaqədar olaraq, neft məhsullarının satışı ilə məşğul olan digər şirkətlər də qiymətlərin azaldılması üzərində işləyirlər".
Tərəflər arasında münasibətlərin normallaşması fonunda inkişaf edən iqtisadi əlaqələr yeni perspektivlər vəd edir. Qarşlıqlı olaraq mal ixracı təbii ki, təkcə iqtisadi yox, həm də siyasi hadisədir.
Bu barədə Crossmedia.az-a danışan Milli Məclisin Beynəlxalq münasibəltər və Parlamentlərarası əlaqələr komitəsinin sədri Səməd Seyidov bildirib ki, regionda sülh təşəbbüskarı məhz Azərbaycandır: "Cənab Prezident yerli mediaya müsahibəsində açıq şəkildə qeyd etdi ki, regionda daimi sülhün bərqərar olması üçün Azərbaycan güclü tərəf kimi ciddi səylər göstərir. Bu səylərin tərkib hissəsi kimi Ermənistanla iqtisadi əlaqələrin yenidən təşkili də mühüm rol oynayır. Çünki siyasi sülh artıq əldə olunub və sülh müqaviləsinin mətni Vaşinqtonda paraflanıb. Azərbaycan sülhü təkcə kağız üzərində deyil, konkret addımlarla dəstəkləyir. Bir müddət öncə Azərbaycan ərazisindən taxılın Ermənistana göndərilməsi, ardınca benzin və neft daşıyan qatarların bu ölkəyə keçməsi sülh istiqamətində atılan real addımlardır. Bu, olduqca məntiqli və doğru yanaşmadır”.
S.Seyidovun sözlərinə görə, Azərbaycan və Ermənistan arasında sülhün təmin olunması Zəngəzur dəhlizinin açılmasına da yol aça bilər: “Azərbaycan regionun aparıcı gücü kimi sülh zəmanətləri yaradır. Bu isə Ermənistan üçün də iqtisadi müstəqillik və siyasi davamlılıq baxımından mühüm imkanlar açır. Azərbaycanın atdığı bu addımlar təkcə iki ölkə arasındakı münasibətlərə deyil, bütövlükdə regionda sülhün möhkəmlənməsinə xidmət edir".
Fatimə Hacıəliyeva
11:01 10.01.2026
Oxunuş sayı: 2025
