Erməni kilsəsi Paşinyan üçün real siyasi rəqibə çevrilməyə çalışır - POLİTOLOQ
Ermənistanda kilsə–hakimiyyət münasibətlərində yeni və həssas mərhələnin başlanğıcı müşahidə olunur. Baş nazir Nikol Paşinyanın 10 yepiskopla birlikdə Erməni Apostol Kilsəsinin “təkmilləşdirilməsi üçün yol xəritəsi”ni imzalaması ölkə daxilində ciddi rezonans doğurub. Sənəd faktiki olaraq kilsə institutunun idarəetmə modelinin dəyişdirilməsini, daxili strukturun yenilənməsini və mövcud rəhbərliyin taleyinə birbaşa təsir edəcək mexanizmləri ehtiva edir. Xüsusilə planın Bütün Ermənilərin Katolikosu II Qareginin gedişindən sonra icra ediləcəyinin açıqlanması bu prosesin hədəfinin məhz hazırkı kilsə rəhbərliyi olduğunu açıq şəkildə göstərir.
Ermənistan daxilində baş verənlər barədə Crossmedia.az-a danışan politoloq Tofiq Abbasov bildirib ki, bu, siyasətdə kifayət qədər tanınmış və tez-tez istifadə olunan bir təcrübədir: "Yəni istənilən strukturun, xüsusilə də bir komandanın daxilində parçalanma yaratmaq müəyyən məqsədlərə xidmət edir. Birinci növbədə daxili qarşıdurma formalaşdırılır, daha sonra isə müxtəlif qruplar – bir qrup digər qrupa, bəzən hətta üçüncü bir qrup da prosesə cəlb olunmaqla – bir-birinə təsir göstərməyə başlayır. Nəticədə idarəolunan xaos yaranır. Bu kontekstdə II Qareginin devrilməsi istiqamətində Nikol Paşinyanın atdığı addımlar, məncə, rasional və məqsədyönlüdür".
Ekspert həmçinin bildirib ki, Erməni Apostol Kilsəsi faktiki olaraq dini institutdan çoxdan uzaqlaşıb və siyasi alətə çevrilib: "Bu struktur daxilində casus şəbəkələrinin formalaşdırılması, maliyyə maxinasiyaları, o cümlədən genişmiqyaslı pul yuyulması halları mövcuddur. Eyni zamanda xarici təsir mexanizmləri də məhz kilsə üzərindən həyata keçirilir. Telefon danışıqları, məxfi yazışmalar, mesajlaşmalar və digər kommunikasiya kanalları artıq Paşinyan hakimiyyətinin nəzarət dairəsindədir. Bu baxımdan hazırda əlavə sübut axtarmağa ehtiyac yoxdur. Kilsə institutu açıq şəkildə saxtakarlıq və qeyri-şəffaf proseslərin mərkəzinə çevrilib, siyasi motivlərlə hərəkət edir və öz mövqelərini qorumağa çalışır. Halbuki kilsə dini təsisat kimi cəmiyyətə ümid, mənəvi dayaq və sabitlik aşılamalıdır. Reallıq isə tam fərqlidir: Erməni kilsəsi davamlı şəkildə müharibə ritorikasını gündəmdə saxlayır, revanşist qüvvələrə açıq dəstək verir və eskalasiya meyillərini qidalandırır. Bu isə onların birbaşa təyinatı ilə qətiyyən uzlaşmır".
Ekspertin fikrincə, bütün bunlar bir daha göstərir ki, erməni kilsəsi özünü faktiki olaraq siyasi partiya kimi aparır və Paşinyan üçün real siyasi rəqibə çevrilməyə çalışır: "Qənaətimə görə, Paşinyan bu məsələyə gedibsə, deməli, özündə kifayət qədər güc hiss edir və situasiyanı düzgün qiymətləndirir. O, anlayır ki, əgər bu mərhələdə II Qaregin zərərsizləşdirilməzsə, gələcəkdə onun qarşısında daha ciddi problemlər yarana bilər. Məhz buna görə də seçkilər öncəsi bu addımların atılması təsadüfi deyil. Məqsəd təhlükəli rəqibi vaxtında neytrallaşdırmaq və onun siyasi təsir imkanlarını məhdudlaşdırmaqdır. Hesab edirəm ki, Nikol Paşinyan bu prosesdən qalib çıxacaq və qarşıya qoyduğu məqsədə nail olacaq".
Ayhan
12:11 08.01.2026
Oxunuş sayı: 1437
