KTMT-dən sülh siqnalı: Münaqişə tamamilə bitir?
Bölgədəki uzun müddətli gərginlik və münaqişələr, hər iki tərəf üçün təhlükəsizlik və sabitlik baxımından ciddi çağırışlar yaradır. Kollektiv Təhlükəsizlik Müqaviləsi Təşkilatı (KTMT) tərəfindən Azərbaycan və Ermənistan arasında sülh sazişinin tezliklə imzalanmasının dəstəklənməsi isə bu prosesin dinamikasını dəyişə biləcək önəmli siqnaldır. KTMT-nin mövqeyi yalnız diplomatik bir bəyanat deyil, həm də regiondakı güc balansına təsir edə biləcək strateji bir addım kimi qiymətləndirilir. Bu baxımdan, təşkilatın təşəbbüsü sülh danışıqlarını sürətləndirə və tərəflər arasında etimadı gücləndirə bilər.
Mövzu ilə bağlı politoloq Ramiyə Məmmədova Crossmedia.az-a açıqlama verib. O bildirib ki, 44 günlük savaş müddətində KTMT-də hər zaman Azərbaycanla Ermənistan arasındakı münaqişənin bitməsini istəyirdi və tərəf tutmamaq mövqeyini qoruyurdu:
‘’Hər iki ölkə Ermənistan KTMT-nın üzvü, Azərbaycan isə müşahidəçi qismində heç vaxt tərəf tutmadı. Bu səbəbdən Ermənistanla KTMT münasibətləri gərginləşməyə başladı. Bugünkü gündə də Ermənistanın KTMT-də iclaslarda iştirak etməməsi KTMT-nın Ermənistan üzvünə dəstək verməməsi kimi qiymətləndirilir. Ermənistan bu barədə bir neçə dəfə bəyanat verib, Rusiyaya ismarıc göndərərək müharibə zamanı pis vəziyyətdə qoyulduğunu bildirib. KTMT Azərbaycan müşahidəçi ölkə, Ermənistan isə üzv olaraq hər zaman müharibənin yekunlaşması və sülh müqaviləsinin imzalanması çağırışlarını irəli sürüb. Daha öncə bəzi hallarda tərəf tutulsa da, savaş zamanı KTMT heç bir tərəfi açıq şəkildə dəstəkləmədi’’.
Politoloq qeyd edib ki, Belarus prezidenti də Rusiyanın mövqeyini bildirərək müharibənin bitməsi və sülh müqaviləsinin tezliklə imzalanmasını dəstəkləyir, digər dövlətlər də buna dəstək verir: ‘’Bu, Rusiyanın mövqeyinin əks olunması və pozisiyasının bildirilməsidir. KTMT ilə Ermənistan arasında münasibətlərdə, Ermənistan de-fakto iştirak etməsə də, de-yure üzv hesab olunur. Paşinyanın bəyanatına görə, iclaslarda iştirak etməməsinə baxmayaraq qəbul olunan qərarlarla razılaşacaq və bu razılaşmalar həm müşahidəçi ölkələr, həm də üzv dövlətlər tərəfindən qəbul edilir. KTMT Rusiya və Ermənistan, həmçinin Azərbaycanla Ermənistan arasındakı savaşın bitməsini nəzərə alaraq sülh müqaviləsinin imzalanması çağırışını davam etdirir. Azərbaycan və Ermənistan arasında paraflanmış müqavilələr nəticəsində Amerika artıq bu sülh müqaviləsini qərb ölkələri adından tamamı ilə dəstəklədiyini bildirib. Bu, KTMT-nin və Rusiyanın Qafqaz regionundakı rolunu göstərir və eyni zamanda ismarıc verir ki, Rusiya olmadan qərblə yaxınlaşmadan da müqavilə imzalanması mümkündür. Putin, Lavrov və onların sözçüləri tərəfindən də bu mövqe bir neçə dəfə ifadə edilib. Bu baxımdan, Azərbaycan və Ermənistan üçün sülh müqaviləsinin imzalanması vacib məsələ kimi qalır. Paraflanmış müqavilələrin detalları məlumdur və tam sülh müqaviləsinin imzalanması, masaya oturularaq münaqişənin həlli əhəmiyyətli bir addım kimi qiymətləndirilir. KTMT və digər təşkilatlar tərəfindən də bu barədə bəyanatlar verilir və iki ölkəyə ismarıc çatdırılır’’.
Sevinc Yarməmmədova
21:20 27.11.2025
Oxunuş sayı: 1017
