Türkiyə daxili siyasətində qarşıdurma: İmamoğluna qarşı məhkəmə iddiası nə ilə nəticələnə bilər?
İstanbul Böyükşəhər Bələdiyyəsinin sabiq sədri, hazırda həbsdə olan Əkrəm İmamoğlunun cinayət işi üzrə ittiham aktı elan edilib.
İstanbul Baş Prokurorluğu İmamoğlunun rəhbərliyində bir cinayət təşkilatının fəaliyyət göstərdiyi qənaətinə gəlib.
İttiham aktında qeyd olunur ki, Əkrəm İmamoğlu 142 müxtəlif əmələ görə məsuliyyətə cəlb edilir və onun barəsində ümumilikdə 2 min 352 il müddətinə azadlıqdan məhrumetmə cəzası tələb olunur.
Həcmi 3 900 səhifə olan sənəddə bir sıra tanınmış şəxslərin adları da yer alır. Məlumata əsasən, iş üzrə ümumilikdə 402 nəfərdən şübhəli şəxs qismində ifadə alınıb.
İttiham tərəfinin iddiasına görə, İmamoğlunun rəhbərlik etdiyi dövrdə dövlətə son 10 il ərzində təxminən 160 milyard lirə həcmində maddi zərər vurulub.
Bu, İmamoğluna qarşı ilk idia deyil. Ümumiyyətlə, Türkiyədə əvvəllər də müxalifət liderlərinə qarşı oxşar iddialar olub. Bu, qardaş ölkənin daxili siyasəti üçün bir növ ənənə halını halıb.
Türkiyədə baş verən son siyasi proseslərdə bağlı politoloq Qabil Hüseynli Crossmedia.az-a danışıb: "Hələlik istintaq başa çatmayıb. Yalnız Əkrəm İmamoğlu deyil, onun ətrafındakı digər şəxslərə qarşı da mümkün hüquqi tədbirlər davam edir. Buna görə indidən qəti fikir söyləmək düzgün olmaz, lakin burada siyasi motivlərin rol oynaya biləcəyini də istisna etmirik. Əkrəm İmamoğlu siyasi reytinq baxımından xalq arasında müəyyən nüfuz qazanmışdı. Hazırda hər şey tam olaraq istintaq yolu ilə araşdırılmayıb. Araşdırmalar başa çatdıqdan sonra Əhkəm İmamoğlunun məsuliyyəti müəyyən edilə bilər. Onun barəsində məhkəmə qərarı, istintaq işləri tamamlandıqdan sonra qanuni şəkildə veriləcək".
Politoloq, həmçinin ümumilikdə Türkiyə daxilində bu məsələyə ictimai reaksiyaların müxtəlif olduğunu qeyd edib: "Əkrəm İmamoğlunu müdafiə edənlər var. Cumhuriyyət Xalq Partiyasının üzvləri onu dəstəkləyir və günahsız olduğunu bildirirlər. İqtidar isə Prezident Rəcəb Tayyib Ərdoğanın timsalında qanunların tətbiq olunacağını və məhkəmə prosesinin qanunlara uyğun aparılacağını vurğulayır".
Elmir Heydərli
12:59 12.11.2025
Oxunuş sayı: 1852
