Cənubi Qafqaz üçün arzuolunmaz ssenari: Ermənistanda radikallar hakimiyyətə gəlsə...
Ermənistan Baş naziri Nikol Paşinyan bu gün brifinqdə deyib ki, ölkədə Erməni Apostol Kilsəsini təqib olunmur.
"Mənim tərəfimdən Erməni Apostol Kilsəsinə qarşı hücumlar yoxdur. Kilsə sənədlərində katolikos vəzifəsini tutan şəxsin, yaxud yepiskopların və kilsənin eyni olduğu yazılmayıb", - o bildirib.
Baş nazirin sözlərinə görə, erməni ruhanilərin həbsinin Azərbaycanla sülh prosesinə aidiyyəti yoxdur:
"Xeyr, bu mümkün deyil. Həbslər və Azərbaycanla sülh prosesi arasında heç bir əlaqə yoxdur".
Qeyd edək ki, çərşənbə günü Erməni Apostol Kilsəsi istintaq orqanları tərəfindən 13 din xadiminin, o cümlədən Araqasotn yeparxiyasının başçısı Mkrtıç Proşyanın (bütün ermənilərin katolikosu II Qareqinin qardaşı oğlu - red) saxlanıldığını bildirib. Din xadimlərinə qarşı açılan iş hökumət əleyhinə mitinqlərdə iştirak etməyə məcbur etmə ilə bağlıdır.
Politoloq Elxan Şahinoğlu Ermənistanda kilsə nümayəndələrinə qarşı trəzyiqlər və bunun Azərbaycanla münasibətlərə mümkün təsiri barədə fikirlərini Crossmedia.az-la bölüşüb.
Onun fikrincə, indi baş verənlər Ermənistanda keçiriləcək parlament seçkiləri ilə əlaqəlidir:
"Baş nazir əsas rəqibləri neytrallaşdırmağa çalışır. Burada “rəqib” dedikdə əsasən təxribatçılar nəzərdə tutulur. Çünki keçmiş prezidentlər Robert Köçəryanla Serj Sarkisyanın reytinqləri çoxu deyil. Paşionyanın şansları daha çoxdur. Moskvanın üstünlük verdiyi iş adamı Samvel Karapetyan isə həbsdədir və seçki ərəfəsində onun həbsdən buraxılması gözlənilmir. Qalır bircə kilsə. Kilsə yeni təxribatlar törədə bilər. Koçaryan və Sarksyandan fərqli olaraq Kilsənin erməni cəmiyyətində nüfuzu böyükdür. Buna görə də Paşinyan Kilsəni nüfuzdan salmaq üçün onu zəiflətməyə çalışır. Bu proses davam edəcək".
Ekspert qeyd edib ki, parlament seçkiləri ilə bağlı Paşinyan təxribatçı rəqibləri zəiflətməyə çalışır:
"Amma hesab edirəm ki, bunun Azərbaycanla sülh məsələsi ilə də əlaqəsi var. Çünki Paşinyan qələbə çalmasa, Azərbaycanla sülh müqaviləsinin imzalanması sual altında qalacaq. Əgər Paşinyanın yerinə radikallar gələrsə, bölgədə vəziyyət daha da gərginləşə bilər".
Türkan Kərimli
19:40 16.10.2025
Oxunuş sayı: 1566
