Paşinyandan mesaj: Regionda nəqliyyat kommunikasiyaları açılır?
Ermənistanın Baş naziri Nikol Paşinyan Tsaxkadzorda "Dağ-mədən sənayesi" forumunda bəyan edib ki, yaxın vaxtlarda Cənubi Qafqazda nəqliyyat kommunikasiyalarının açılması mütləq baş tutacaq.
"Əminəm ki, Ermənistan və Azərbaycan arasında təsdiqlənmiş sülh, həmçinin regional infrastrukturların və nəqliyyat kommunikasiyalarının yaxın zamanda mütləq baş tutacaq gözlənilən açılışı dağ-mədən sənayesi üçün daha əlverişli mühitin formalaşmasına kömək edəcək", - o bildirib.
Paşinyanın səsləndirdiyi fikirlər barədə Crossmedia.az-a danışan politoloq Aytən Qurbanova bildirib ki, nəqliyyat-kommunikasiya xətlərinin açılması regional ölkələrin iqtisadiyyatına töhfə verməklə yanaşı, eyni zamanda davamlı və dayanıqlı sülhün təmin olunması baxımından kifayət qədər mühüm əhəmiyyət kəsb edir:
"Xüsusilə Ermənistan-Azərbaycan arasında davam edən normallaşma prosesi çərçivəsində nəqliyyat-kommunikasiya xətlərinin bərpa olunması, iki ölkə arasında əlaqələrin, eyni zamanda Azərbaycanın əsas hissəsinə Naxçıvana keçidin təmin olunması, orta dəhlizin önəmli parçası olaraq tramvay yolunun işləkliyinin təmin olunması regional proseslərdə bir çox istiqamətdə dövlətlərarası əməkdaşlığı təşviq edəcək nəticələri özündə ehtiva edir.
Xüsusilə 30 ilə yaxın davam edən işğal dövründə bütün regional proseslərdən və layihələrdən təcrid olunan Ermənistanın nəqliyyat-kommunikasiya xətlərinin bərpa olunması fonunda tranzit ölkə statusu qazana bilməsi və eyni zamanda Azərbaycanla əməkdaşlıq, Türkiyə ilə əməkdaşlıq fonunda əlaqələrinin genişlənməsi imkanları onun gələcəyə yönəlik inkişaf perspektivlərindən daha çox töhfə verə bilər".
Ekspert qeyd edib ki, iki ölkə arasında həm diplomatik əlaqələrin bərpa olunması, həm də itirilmiş etimadın mərhələli şəkildə bərpa edilməsi istiqamətində atılacaq addımlarda nəqliyyat-kommunikasiya xətlərinin bərpa olunması xüsusi önəm kəsb edir:
"Yolların açılması, əlaqələrin qurulması, yeni layihələrin icra olunması, tranzit imkanlarının dəyərləndirilməsi, həmçinin iqtisadi nəticələrin özündə ehtiva olunması ilə paralel olaraq bir çox istiqamətdə siyasi əlaqələrin möhkəmləndirilməsi və gələcəyə yönəlik yeni əməkdaşlıq imkanlarının və yol xəritəsinin formalaşdırılmasına da təşviq edə bilər. Hər bir halda, ümumilikdə Ermənistan-Azərbaycan arasında davam edən sülh prosesi və eyni zamanda normallaşma prosesi birmənalı şəkildə bir çox strateji istiqamətləri özündə ehtiva edir və bunların təşviq olunması, sürətləndirilməsi baxımından da nəqliyyat-kommunikasiya əlaqələri mühüm rola malikdir".
Türkan Kərimli
16:39 04.10.2025
Oxunuş sayı: 14352
