Ermənistan konstitusiyasını dəyişməzdən əvvəl sülh sazişi imzalanacaq?- Tofiq Zülfüqarovdan mühüm açıqlama
Ermənistan parlamentinin spikeri Alen Simonyan Azərbaycanla sülh sazişinin konstitusiya islahatlarından əvvəl imzalanması ehtimalını istisna etməyib.
Onun sözlərinə görə, Ermənistanda konstitusiya islahatları prosesi Azərbaycanın tələbləri ilə bağlı deyil.
A.Simonyan vurğulayıb ki, konstitusiya islahatları ilə bağlı müzakirələr indiki Ermənistan hökuməti tərəfindən koronavirus pandemiyasından əvvəl başladılıb.
Ermənistanda hakim "Vətəndaş müqaviləsi" partiyası ölkənin yeni konstitusiyasının qəbul edilməsi təşəbbüsü ilə çıxış edib. Gözlənilir ki, partiya 2026-cı ilin iyununda Ermənistanda keçiriləcək parlament seçkilərində xalqın səsini qazandıqdan sonra ümumxalq referendumu yolu ilə yeni konstitusiyanın qəbul edilməsi prosesini başladacaq.
Məlumdur ki, Azərbaycanın sülh sazişi ilə bağıı əsas tələblərindən biri Ermənistan Konstitusiyanın dəyişdirilməsidi Çünki Ermənistan Konstitusiyasının Azərbaycana qarşı konkret ərazi iddiaları var. Bu isə mümkün sülh sazişinin davamlılığını sual altına qoyur.
Simonyanın səsləndirdiyi fikirlər isə maraq doğurur. Doğrudan da, konstitusiya dəyişikliyi olmadan sülh sazişinin imzalanması mümkündürmü?
Keçmiş xarici işlər naziri Tofiq Zülfüqarov bu barədə Crossmedia.az açıqlama verib: "Sülh sazişi üçün Ermənistanda geniş ictimai diskursa ehtiyac var. Bunun nəticəsində məlum olacaq ki, sülhə razı olan yalnız Ermənistan hakimiyyətidir, yoxsa bütövlükdə Ermənistan cəmiyyəti? Ermənistanda gözlənən Konstitusiya dəyişikliyindən əvvəl ümumxalq referendumu keçirilməlidir. Bu referendumun nəticəsi Ermənistanın sülhə nə qədər hazır olmadığını göstərəcək. Odur ki, Konstitusiya dəyişikliyi əslində göründüyündən daha böyük əhəmiyyətli məsələ olub Ermənistan cəmiyyətinin sülhə olan münasibətini göstərəcək"
Mehriban İbrahimli
16:09 26.09.2025
Oxunuş sayı: 2134
