Cənubi Qafqazda “gün çıxır”: Azərbaycandan Ermənistana qaz ixracı ilə Rusiya asılılığına son qoyulacaq
"Qazprom Ermənistan" şirkətinin mətbuat xidmətindən bildirilib ki, Rusiyanın Ermənistana qaz tədarükü bu gün bərpa edilib.
Qeyd olunub ki, təmir işləri planlaşdırılmış vaxtdan tez başa çatıb.
Qaz təchizatı Stavropol diyarında "Şimali Qafqaz – Zaqafqaziya" magistral qaz kəmərində təmir işləri ilə əlaqədar sentyabrın 15-dən müvəqqəti dayandırılmışdı.
Ermənistanda istehlakçılar daxili ehtiyatlar və İrandan daxil olan əlavə yanacaq həcmləri hesabına qazla fasiləsiz olaraq təchiz edilib.
Bu prosesin tərəflər arasındakı siyasi münasibətlərə təsiri barədə Crossmedia.az-a danışan İqtisadçı-ekspert, ReAl Partiyasının sədri Natiq Cəfərli bildirib ki, sözügedən addım Ermənistanın baş naziri Nikol Paşinyanın Moskvaya gözlənilən səfəri ilə bağlıdır: “Ermənistan qaz tədarükündə 80 faiz Rusiyadan asılıdır. Rusiya zaman-zaman bu alətdən Ermənistana təzyiq üçün istifadə edir. Bu, indi də gündəmdədir. Gələn il keçiriləcək parlament seçkiləri öncəsi Rusiya Ermənistan üçün gərginlik yaradılması səbəbindən bu alətdən daha tez-tez istifadə edəcək. Ermənistan Xarici İşlər Nazirliyi bir neçə dəfə bildirib ki, onlar Azərbaycandan qaz ala bilərlər. Bu, Rusiyadan asılılığın azalmasına səbəb ola bilər. Müəyyən texniki işlər görüldükdən sonra Azərbaycandan Ermənistana qaz ötürülməsi mümkündür”.
N. Cəfərli həmçinin qeyd edib ki, Ermənistanın illik qaz tələbatı 1,7-1,8 milyard kubmetrdən artıq deyil: “Azərbaycan onun 20-25 faizini təmin edə bilər. Bu isə iki ölkə arasında münasibətlərin normallaşması prosesinə töhfə verə bilər”.
Müsahibimiz, həmçinin Avropanın bu proseslərə mümkün reaksiyasından da danışıb: “Regionda Ermənistanın təhlükəsizliyi və iqtisadi inkişafı ilə bağlı yeganə zəmanətverici addım sülhdür. Nə Fransa, nə Avropa İttifaqı ciddi nə isə edə bilər. Vəait ayrıla bilər. Lakin nəzərə almaq lazımdır ki, pulla hər şey həll olunmur. Biz bunu Şərqi Avropada davam edən müharibədə görürük. Ermənistanın inkişafı Azərbaycan və Türkiyə ilə münasibətlərdən asılıdır. Ermənistan baş naziri Nikol Paşinyan addım- addım olsa da bu istiqamətdə işlər görür”.
Fidan Quliyeva
23:02 25.09.2025
Oxunuş sayı: 1036
