Kommunikasiyaların açılması üçün əsas qərarverici tərəflər Azərbaycan və Ermənistandır, ABŞ isə... - Ekspert
Ermənistanın Baş nazirinin müavini Mqer Qriqoryan ABŞ-ın Ermənistandakı səfiri Kristina Kvini qəbul edib. Görüş zamanı iki ölkə arasındakı ikitərəfli münasibətlərin inkişaf perspektivləri, eləcə də avqustun 8-də Vaşinqtonda Ermənistan və Azərbaycan arasında əldə edilmiş razılaşmaların önəmi müzakirə olunub. Həmçinin, ABŞ və Ermənistan arasında imzalanmış anlaşma memorandumlarının əhəmiyyəti vurğulanıb ki, bu da regionda diplomatik əlaqələrin möhkəmləndirilməsinə və sülh prosesinə töhfə verə bilər.
Mövzu ilə bağlı AMEA-nın elmi işçisi, siyasi şərhçi Vüsalə Gülmalıyeva Crossmedia.az-a açıqlamasında bildirib ki, ABŞ-nin Cənubi Qafqaz regionunda təsir imkanları həm siyasi, həm də iqtisadi baxımdan mövcuddur: "Vaşinqton xüsusilə regionda sabitliyin qorunması, yeni nəqliyyat və enerji marşrutlarının açılması, eləcə də strateji tərəfdaşlarının maraqlarının təmin olunmasında maraqlıdır. Kommunikasiyaların açılması ABŞ üçün yalnız regional iqtisadiyyatın inkişafı deyil, həm də ümumi təhlükəsizlik və inteqrasiya baxımından əhəmiyyətlidir. Amma praktiki baxımdan ABŞ-nın təsir imkanları birbaşa deyil, daha çox diplomatik vasitəçilik, tərəflərə siyasi dəstək və iqtisadi təşviqlərlə məhdudlaşır. ABŞ həm Ermənistan, həm də Azərbaycanla ayrı-ayrı səviyyələrdə danışıqlar apararaq bu prosesi dəstəkləyə bilər. Gözlənilən addımlar arasında tərəflərin siyasi iradəsini möhkəmləndirən çağırışlar, beynəlxalq institutlar vasitəsilə kommunikasiyaların açılmasına texniki-iqtisadi dəstək və prosesin beynəlxalq legitimliyini artırmaq üçün təşəbbüslər ola bilər. Nəticə etibarilə, kommunikasiyaların açılması üçün əsas qərarverici tərəflər Azərbaycan və Ermənistandır. ABŞ isə bu prosesdə daha çox təşviqedici və dəstəkləyici rol oynaya bilər".
Mehriban Yariyeva
13:07 05.09.2025
Oxunuş sayı: 1368
