"Günün - günorta çağı" Qriqoryanın Parisdə nə işi var?: "Yeni mexanizmlər dəqiqləşəcək"
Ermənistanın Təhlükəsizlik Şurasının katibi Armen Qriqoryan sentyabrın 4-də Parisə işgüzar səfər edəcək. Səfər çərçivəsində işgüzar görüşlər planlaşdırılır.
Məlum olduğu kimi, Fransa həmişə Cənubi Qafqazda destruktiv siyasətdə maraqlı olub. Bu mənada Azərbaycanla Ermənistan arasında münasibətlərin normallaşması, o cümlədən avqustun səkkizində Vaşinqtonda əldə olunan razılaşmalar Parisi narahat etməmiş deyil.
O da məlumdur ki, Ermənistan rəsmilərinin Fransaya səfərləri adətən xeyrə işarə olmur. Elə isə münasibətlərin normallaşdığı bir vaxtda, necə deyərlər, günün - günorta çağı Ermənistan Təhlükəsizlik Şurasının katibin Parisdə nə işi var?
Bu barədə Crossmedia.az-a danışan siyasi şərhçi Pərviz Mirizadə bildirib ki, Qriqoryanın Parisə gözlənilən işgüzar səfəri zamanlama nöqteyi-nəzərdən ənənəvi diplomatik prosedurdan fərqlənir: "Hesab edirəm ki, bu səfər Fransanın regionda baş verən mühüm geosiyasi dəyişikliklərə adekvat reaksiya vermək instiktindən qaynaqlanır. Bilindiyi kimi, avqustun 8 - də Prezident Donald Trampın moderatorluğu ilə keçirilən Vaşinqton görüşü və əldə olunan tarixi əhəmiyyətli razılaşmalar regionun gələcək taleyində əsaslı dönüş nöqtəsi kimi qiymətləndirilir. Fransa öz növbəsində iki ölkə arasında mövcud olmuş keçmiş münaqişənin həmsədr institutunun üzvü, həm Ermənistanı dəstəkləyən fəal aktorlardan biri, həm də Cənubi Qafqazda maraqları olan tərəf kimi mövcud proseslər fonunda öz rolunu aydınlaşdırmağa çalışır. Çünki liderlərin ABŞ səfəri Fransanın simasında keçmiş narrativlərdən öz regional maraqlarını təmin etməyə çalışan qüvvələr üzərində domino effekti yaratdı".
Müsahibibimiz bildirib ki, rəsmi Paris 44 günlük Vətən Müharibəsindən sonra fəal şəkildə Ermənistandakı ultraşovinist və revanşist qüvvələri dəstəkləyir, İrəvanı müxtəlif növ hücum silahları ilə təmin edir və Avropa İttifaqının Müşahidə Missiyasının hiperaktivləşməsi fonunda regionda yeni münaqişəyə zəmin yaradırdı: "Bu isə öz növbəsində bölgəni mümkün olan bütün iqtisadi - ticari perspektivlərə zərbə vururdu. Ancaq indi tamamilə fərqli geosiyasi və geoiqtisadi arxitektura formalaşıb və Fransakı Emmanuel Makron administrasiyası ənənəvi yanaşmaların uğursuzluğu düçar olduğunu əyani şəkildə müşahidə edir. Bu səbəbdən də hesab edirəm ki, Qriqoryanın səfəri Parisin yeni mexanizmləri dəqiqləşdirmək istəyindən qaynaqlanır".
Niyaz Hacıyev
16:26 03.09.2025
Oxunuş sayı: 12207
