Kavelaşvili Türkiyədə danışdı: Gürcüstan Vaşinqtonda əldə olunan razılaşmalardan niyə rahatdır?
Gürcüstan Prezidenti Mixeil Kavelaşvili türkiyəli həmkarı Rəcəb Tayyib Ərdoğanla birgə mətbuat konfransında bildirib ki, Tbilisi Azərbaycanla Ermənistan arasında münasibətlərin normallaşmasına töhfə verməyə davam edəcək. O vurğulayıb ki, Cənubi Qafqazda sabitlik Gürcüstan üçün strateji əhəmiyyət daşıyır və bu regionda sülh və əməkdaşlığın gücləndirilməsi rəsmi Tbilisinin prioritetidir.
Cənubi Qafqazdakı sülh və sabitliyin təmin olunması rəsmi Tbilisi üçün həm təhlükəsizlik, həm də strateji əhəmiyyətli məsələdir. Gürcüstan bunu əvvəlki dövrlərdə açıq nümayiş etdirib. Kavelaşvilinin açıqlaması göstərir ki, ölkəsi bundan sonra da regionda əməkdaşlıq mühitinə töhfə verməyə davam edəcək. Bəs Gürcüstan bu əməkdaşlığın güclənməsi üçün gələcəkdə başqa hansı addımlar ata bilər. 
Bu barədə Crossmedia.az-a danışan politoloq Əhəd Məmmədli bildirib ki, Gürcüstanın Azərbaycan-Ermənistan münasibətlərinin normallaşdırılmasına vasitəçi roluna ehtiyac yoxdur: "ABŞ Prezidenti Donald Tramp artıq vasitəçilik edir. Yəni "böyük balıq" olan yerdə "kiçik balıqlara" ehtiyac yoxdur. Əvvəl Moskva "meydançasında" görüşlər keçirilirdisə, indi müzakirələr Vaşinqtonda, Brüsseldə baş tutur. Ona görə Gürcüstan yalnız müşahidəçi rolunu tutur. İndi Gürcüstan öz əhəmiyyətini və vacibliyini göstərmək üçün hərəkət etməyə çalışır. Bəlkə də, prosesləri müəyyən narahatlıqla bunu qarşılayır. Çünki indiyə qədər Gürcüstan Azərbaycan üçün tranzit ölkə idi. Amma sabah sərhədlər açılsa, Ermənistan tranzit ölkəyə çevrilə bilər. Gürcüstan buna görə də narahatdır, çünki ölkənin vacibliyi itə bilər – həm Azərbaycan, həm də ümumiyyətlə region üçün”.
O əlavə edib: “İndi isə proses davam edir və Gürcüstan bu məsələlərdə müəyyən rol almağa çalışır. Amma, fikrimcə, bu ikinci plandadır. Gürcüstanın vasitəçilik rolu artıq əsas deyil, çünki əsas vasitəçilər öz rollarını artıq icra edirlər. İndi top hər iki tərəfdədir – Azərbaycan və Ermənistanda. Proseslərin necə inkişaf edəcəyini bu iki ölkə müəyyənləşdirəcək".
Mehriban Yariyeva
13:28 13.08.2025
Oxunuş sayı: 9823
