Politoloq: "Paşinyan "dəlləklik edə-edə..."
Rusiyanın TASS agentliyi xəbər verir ki, Rusiya Erməni İttifaqının prezidenti Ara Abramyan 2026-cı il parlament seçkilərində Ermənistanın Baş naziri Nikol Paşinyana qarşı olan siyasi qüvvələrin birləşməsinə yardım etməyi planlaşdırır. O bildirib ki, diasporun və digər potensialların imkanlarını Ermənistanın dirçəlişi üçün səfərbər etmək niyyətindədir. Abramyan, həmçinin Paşinyan hökumətini Qarabağı itirməkdə, əsas obyektləri xaricilərə verməkdə və ölkədə sosial-iqtisadi vəziyyəti ağırlaşdırmaqda ittiham edib.
Abramyanın belə bir təşəbbüslə çıxış etməsi Ermənistan daxilində Paşinyana qarşı narazılığın və alternativ axtarışlarının artdığını göstərir. Diasporanın bu prosesə aktiv şəkildə cəlb olunması isə qarşıdakı seçkilərdə ciddi geopolitik təsirlərin olacağını istisna etmir.
Onun səsləndirdiyi fikirlər barədə Crossmedia.az-a danışan politoloq Tofiq Abbasov söyləyib ki, Abramyan artıq, 7-8 ay bundan əvvəl Ermənistana səfər etmişdi və qayıdanda özü ilə bir mesaj gətirmişdi: "Onu həm Rusiya dövlətinin, həm də Rusiyada yaşayan erməni diasporunun mesajı kimi qəbul etmək olar. Çünki onu hava limanında saxladılar, bir neçə saat orada qaldı, sənədlərinin qaydasında olmadığını dedilər. Onu əməlli-başlı əsəbləşdirdilər və bir neçə saatdan sonra şəhərə çatdırdılar. Ermənistan çox pis vəziyyətdədir və bunun günahkarı Paşinyandır. Amma məsələ ondadır ki, Abramyan özü çox savadsızdır. İmkanlı adam olmasına baxmayaraq, savadsız, bacarıqsız, qətiyyətli danışıq qabiliyyətinə malik olmayan adamdır. Amma hər halda onu danışdıran da, dilləndirən də maddi imkanlarıdır, Rusiya da bunu gözəl başa düşür ki, Ermənistanda özünəməxsus bir kastinq keçirmək lazımdır ki, ortadakı simalar arasında növbəti lider seçilsin".
Ekspertin sözlərinə görə, bunu hamıdan yaxşı bilən də Paşinyanın özüdür: "2018-ci ildən hakimiyyətə gəldikdən sonra bu adam, bəlkə də, "dəlləklik edə-edə" öz komandasını formalaşdırır və digər tərəfdən də risk və çağırışlara tutarlı cavablar tapa bilir. Əsas məsələ də ondan ibarətdir ki, güc strukturlarında Paşinyanın böyük dayaqları var. Yəni faktiki olaraq bu illər ərzində keçmiş prezidentlər Robert Koçaryan, Serj Sarkisyan töküntüsündən demək olar ki, qurtula bilib. Yüksək səviyyədə və orta səviyyədə kadr potensialını dəyişə bilib. Amma hələ də onların tərəfdarları var və təsadüfi deyil ki, Azərbaycanla sərhəddə təxribatlar törədən də məhz o köhnə hakimiyyətin "qırıntılarıdır"”.
Politoloq Paşinyanın kilsəyə qarşı “səlib yürüşü”-nə çıxdığını bildirib: ""Taşir" Şirkətlər qrupunun həbsdə olan rəhbəri "Tasir" şirkətinin rəhbəri Samverl Karapeytan və onun komandası ciddi şəkildə çalışır ki, hakimiyyətin təməlini laxladıb, onun dayaqlarını sarsıtsın və sonradan hakimiyyət çevrilişini həyata keçirsin. Mən elə başa düşürəm ki, Abramyan ümumiyyətlə Ermənistanda elə də populyar şəxs deyil. İmkanlı olmasına baxmayaraq, siyasi lider kimi onu çox az dəstəkləyir. Digər tərəfdən, Paşinyanın ən əsas problemi ondan ibarətdir ki, çalışmalıdır iki dərin dövlət funksiyasını yerinə yetirən mərkəzi tərksilah etsin. Söhbət diasporadan və Kilsədən gedir. Ona görə də demək olar ki, Paşinyana qarşı "səlib yürüşü" başlanıb. Görürük ki, Emənistanda mərkəzləşdirilmiş idarəetmə sistemi yoxdur. Yəni Paşinyan bir əli ilə çalışır idarə etsin, o biri əli ilə də sağa-sola zərbə vurur ki, “mənə mane olmayın”.
Paşinyanın Ermənistanla bağlı real baxışı ondan ibarətdir ki, rəsmi İrəvan həmin o kənar qüvvələrin təsirindən çıxmalıdır və normal dövlət idarəetmə sisteminə keçməlidir: "Bu baş verəcəksə, mümkün olacaqsa, Paşinyan, həqiqətən də, Ermənistan daxilindəki savaşda qalib gələ bilər. Çünki bu təsirlər heç də az əhəmiyyətli deyil. Onların ölkə daxilində kifayət qədər nümayəndələri var, "Beşinci kolon" işləyir. Digər tərəfdən, onlar insanlara maliyyə dəstəyi göstərirlər və bununla da təsirlərində olan bəzi təbəqələri, insanları Paşinyana qarşı qaldırmağa çalışırlar. Paşinyan da bunu gözəl başa düşür, amma hələlik vəziyyəti idarə edə bilir. Parlament seçkiləri yaxınlaşdıqca Paşinyan imkanlarını və bacarıqlarını planlı şəkildə davam etdirəcək. Əgər fövqəladə hadisə baş verməsə verməsə, yəni terror törədilməsə, hərbi qiyam baş verməsə, düşünürəm ki, Paşinyan sabitliyi saxlaya biləcək və seçkilərdə də uğur qazanacaq”.
Nicat Rüstəmzadə
16:05 01.08.2025
Oxunuş sayı: 10940
