Azərbaycanlılar Rusiya kəşfiyyatının "toruna düşür?": Ukraynalı polkovnik öldürüldü, sonra isə...
İyulun 10-da Kiyevdə Ukrayna Təhlükəsizlik Xidmətinin (UTX) polkovniki İvan Voroniç qətlə yetirilib. Bu prosesdə azərbaycanlılar ittiham olunur. Əgər ittihamlar əksini taparsa, bunun Ukrayna- Azərbaycan münasibətlərinə təsir edəcəyi şübhəsizdir.
Maraqlıdır ki, polkovnikin qətli Moskva - Bakı münasibətlərinin pisləşdiyi vaxta təsadüf edir. Elə isə sual yaranır: bu, Rusiyanın növbəti təxribatı ola bilərmi?
Bu barədə Crossmedia.az-a danışan politoloq Elxan Şahinoğlu deyib ki, UTX əməkdaşının qətlində iki Azərbaycan vətəndaşının iştirak etdiyi xəbəri təsdiqlənərsə, bunu Rusiyanın Azərbaycana qarşı növbəti təxribatı kimi qiymətləndirmək olar: "Rusiya kəşfiyyat xidmətinin ukraynalı zabiti öldürmək üçün Xaqani Quləlizadə və Nərmin Quliyeva adlı Azərbaycan vətəndaşlarından istifadə edildiyi xəbəri yayılıb. Hər ikisi Rusiyada çalışırmış. Fikrimcə, Rusiya kəşfiyyat xidmətinin ukraynalı zabiti qətlə yetirmək tapşırığını Azərbaycan vətəndaşlarına tapşırması Azərbaycan-Ukrayna münasibətlərinə kölgə salmaq məqsədi daşıyır.
Kreml Rusiyada çalışan miqrantlara həm zorla sənəd imzalatdıraraq onları birinci sırada Ukrayna ilə müharibədə ölümə göndərir, həm də bir qismini qatilə çevirməyə çalışır. Ukraynanın ərazi bütövlüyü uğrunda qəhrəmancasına şəhid olan Ukrayna vətəndaşı olan soydaşlarımız olduğu kimi Rusiya kəşfiyyatının "toruna düşərək" qatilə çevrilənlər də var. Diqqətli olmalıyıq. Rusiya Azərbaycanla münasibətlərinin gərginləşməsi fonunda soydaşlarımıza qarşı başqa təzyiq formalarından da istifadə edə bilər".
Kənan Novruzov
20:35 14.07.2025
Oxunuş sayı: 11945
