“Erməni kilsəsi Ermənistan dövləti üçün riskə çevrilib” - Deputat
Erməni Apostol Kilsəsinin son dövrlərdə regionda və xüsusilə Ermənistanda oynadığı destruktiv rol getdikcə daha aydın şəkildə üzə çıxır. Kilsə dini qurum statusunu aşaraq siyasi proseslərə birbaşa müdaxilə edir, ictimai sabitliyi pozmağa yönəlik bəyanatlar və çağırışlarla çıxış edir. Katolikosun qardaşı Yezras Nersisyanın son açıqlaması da bunu bir daha təsdiqləyir. O, açıq şəkildə Ermənistanda inqilabın baş verməsi üçün kilsənin səylərini artıracağını bəyan edib və sülh prosesinə qarşı çıxaraq hökumətin siyasətini qəbulolunmaz adlandırıb. Bu kimi çıxışlar, həm regionda sülhə, həm də Ermənistanın daxili sabitliyinə ciddi təhlükə yaradır və erməni kilsəsinin pozuculuq fəaliyyətlərinin artıq dini çərçivəni aşaraq siyasi təxribat alətinə çevrildiyini göstərir.
Mövzuyla bağlı Milli Məclisin deputatı Tural Gəncəliyev Crossmedia.az-a açıqlama verib:
“Erməni Apostol Kilsəsinin son zamanlar tək Ermənistanda deyil, ümumiyyətlə qonşu ölkələrlə və regionla bağlı səsləndirdiyi fikirlər və ortaya qoyduğu mövqe narahatedici məqamdır. Çünki erməni kilsəsi bu gün deyil, tarixən — Ermənistan dövlət olmayanda belə — anti-islam, anti-türk mövqeyindən çıxış etmişdir. Hazırda Ermənistanda revanşist qüvvələrin başında duran da məhz erməni kilsəsidir. Erməni kilsəsi o dərəcədə həddini aşıb ki, Ermənistan dövlətinin özü üçün böyük risk mənbəyinə çevrilib. Biz həmişə deyirik ki, Ermənistan dövləti müstəqil bir dövlət kimi fəaliyyət göstərməyi bacarmadığı üçün regionda destabillik prosesinə start verildi, müharibə baş verdi. Həmçinin bu Ermənistanın müstəqil olmaması, Ermənistanın erməni diasporasından və erməni kilsəsindən olan asılılığı ilə əlaqələndirilir. İndi Ermənistan hakimiyyəti başa düşür ki, erməni kilsəsi bundan əvvəlki hökumətləri erməni revanşizmində istifadə etmişdir. Bu gün yenə də erməni kilsəsi təhlükədir. Hazırda erməni kilsəsinin Azərbaycanla Ermənistan arasında olan sülhə mane olması, Rusiya-Ukrayna müharibəsini dəstəkləməsi və Ermənistanda qarışıqlıq salması bir daha göstərir ki, Ermənistan erməni kilsəsini öz həddini bildirməsə, öz əndazəsinə qaytarmasa, regionda qarışıqlıq ola bilər. Bu baxımdan erməni kilsəsinin vaxtilə xarici dövlətlərdə olan xristianlar tərəfindən idarə olunan, qarışıqlıq salınmasını istəyənlərin manipulyasiya aləti olduğunu hamı bilir. Hazırda da o manipulyasiya aləti Ermənistanın özünə qarşı çevrilib. Belə olan halda erməni kilsəsi ya fəaliyyətini dayandırmalı, ya da Azərbaycanın yaratdığı reallıqları qəbul etməlidir”.
Ayhan
17:00 12.07.2025
Oxunuş sayı: 12256
