Ermənistan danışır, lakin açmır: İrəvanın nəqliyyat açıqlamaları manipulyasiyadır -ŞƏRH
“Ermənistan və Azərbaycan arasında nəqliyyat yollarının açılması İrəvan üçün mühüm prioritetdir”.
Bunu Ermənistan Xarici İşlər Nazirliyinin sözçüsü Andi Badalyan deyib.
“Cənubi Qafqazda nəqliyyat infrastrukturunun blokdan çıxarılması Ermənistan üçün mühüm prioritet olub və belə də qalır. Məlum olduğu kimi, Ermənistan regional kommunikasiyalarla bağlı “Sülh qovşağı” layihəsini təklif edib və bu, artıq bir sıra beynəlxalq tərəfdaşlardan müsbət cavab alıb. Üstəlik, Ermənistan bu təşəbbüsə uyğun bir sıra həll yolları təklif edib ki, bu da bütün tərəflər üçün məqbul ola bilər. Həmçinin beynəlxalq tərəfdaşlar da vaxtaşırı Ermənistan-Azərbaycan münasibətlərinin normallaşdırılması, o cümlədən iki ölkə arasında nəqliyyat infrastrukturunun blokdan çıxarılması ilə bağlı öz təkliflərini verirlər.
Regionun transsərhəd potensialını reallaşdıran faydalı nəticələrin əldə edilməsi məqsədilə bütün maraqlı tərəfdaşlarla müzakirələr davam etdirilir”, - diplomat bildirib.
Cross Media Təhlil Mərkəzinin analitiki, siyasi şərhçi, Crossmedia.az Analitik İnformasiya Portalının Baş redaktoru Mübariz Göyüşlü Sherg.az-a deyib ki, Andi Badalyanın bu məsələdə səmimi olduğuna inanmaq çətindir:
"Ermənistanın son dövrlərdəki davranışları onun səsləndirdiyi bəyanatlarla üst-üstə düşmür. Əgər Ermənistan həqiqətən də regional əməkdaşlıqda maraqlı olsaydı və dediklərini əməli addımlarla sübut etmək istəsəydi, indiyədək Zəngəzur dəhlizi açılmış olardı. Halbuki bu günə qədər Azərbaycanın qərb rayonları ilə Naxçıvan Muxtar Respublikası arasında birbaşa quru nəqliyyat əlaqəsi bərpa olunmayıb. Bu, təkcə Azərbaycanın daxili əlaqəliliyinə deyil, ümumilikdə regionun iqtisadi inteqrasiyasına ciddi maneədir. Hazırda Ermənistanın iki ölkə arasında nəqliyyat kommunikasiyalarının açılmasından və guya "Sülh qovşağı" adlı layihədən bəhs etməsi real vəziyyətlə ziddiyyət təşkil edir. Həmçinin daha çox görüntü xatirinə aparılan informasiya kampaniyasını xatırladır".
Analitik əlavə edib ki, bəzi beynəlxalq tərəfdaşlar tərəfindən bu ideyalara ilkin müsbət münasibət bildirilsə də, faktiki vəziyyət göstərir ki, bu, praktik olaraq heç bir nəticə vermir:
"Buna görə də Ermənistanın bu sahədə atdığı addımları səmimi və real əməkdaşlıq niyyəti kimi qəbul etmək çətindir. Əməli addımlar olmadıqca, istənilən bəyanat, Badalyan və digər rəsmi şəxslər tərəfindən səslənə bilər. Bu ictimaiyyətə yönəlmiş manipulyativ çıxışdan o tərəfə keçmir".
16:27 03.07.2025
Oxunuş sayı: 13195
