"Ermənistanın sülh çağırışları riyakarlıq və manipulyasiyadır" - DEPUTAT
Cənubi Qafqazda sülhün təmin olunması üçün beynəlxalq ictimaiyyətin fəal mövqeyi vacibdir. Ermənistan parlamentinin ATƏT PA-dakı nümayəndə heyətinin üzvü Artur Ovannisyan bu fikri səsləndirərək, bölgədə davamlı sabitliyin yalnız birgə səylərlə mümkün olacağını bildirib.
Mövzu ilə bağlı Milli Məclisin deputatı, Ana Vətən Partiyasının sədr müavini Günay Ağamalı Crossmedia.az-a açıqlama verib.
Deputat Günay Ağamalı, Ermənistanın nümayəndəsinin sülh çağırışlarının riyakarlıq və manipulyasiya olduğunu, əslində isə himayədar axtarışı və revanşist siyasət yürütdüyünü bildirib: "Ermənistan parlamentinin ATƏT PA-dakı nümayəndəsi Artur Ovannisyanın "Cənubi Qafqazda sülh üçün dünya ictimaiyyətinin dəstəyi lazımdır" fikri riyakarlıqdan başqa bir şey deyil. Sülhə çağırış edən Ermənistan hələ də uzun illər ərzində törətdiyi işğal, barbarlıq, vandalizm və etnik təmizləmə siyasətinə görə heç bir məsuliyyət hissini dərk etmir, əksinə, yenə də beynəlxalq tribunalardan manipulyativ ritorika ilə çıxış edir.
Digər tərəfdən, Artur Ovannisyanın dünya ictimaiyyətindən dəstək istəyəcək tərzdə fikirlər səsləndirməsi Ermənistanın himayədar güc axtarışında olduğunun sübutdur. Onlar üçüncü qüvvələrin danışıqlarda iştirakını təmin etməklə Azərbaycandan hansısa bir imtiyazlar əldə edə biləcəklərinə ümid edirlər. Lakin,
Ermənistan sülh istədiyini deyirsə, ilk növbədə konstitusiyasındakı və hüquqi normativ aktlarında Azərbaycana qarşı ərazi iddialarını aradan qaldırmalı, bölgədə sabitliyi pozacaq revanşist ritorikaya və silahlanma cəhdlərinə son qoymalıdır. Əks halda bu cür çağırışlar beynəlxalq ictimaiyyəti çaşdırmaq üçün atılmış populist addımlardır".
G.Ağamalı qeyd edib ki, sülh yalnız ədalətə və beynəlxalq hüquqa əsaslanaraq mümkün ola bilər: "Azərbaycan sülhün tərəfdarıdır. Sülh, Azərbaycanın haqlarının tapdanması, birtərəfli şəkildə imtiyazlar verməsi və ya Ermənistanın tələblərinə boyun əyməsi hesabına qurulmamayacaqdır. Əksinə, sülh ədalətə, beynəlxalq hüququn normalarına və Azərbaycanın tarixi, hüquqi mövqeyinə əsaslanacaqdır. Bunu Rəsmi İrəvan dərk etməli və bu istiqamətdə hərəkət etməlidir".
Deputat Ermənistanın sülh prosesinə mane olduğunu, danışıqlardan yayınaraq prosesin uzanmasına səbəb olduğunu və üçüncü tərəflərin müdaxiləsinə bel bağlayan bir dövlət olduğunu bildirib: "Ermənistan bu günə qədər sülh gündəliyinə sabotaj xarakterli yanaşması ilə fərqlənib, dəfələrlə danışıqlardan yayınaraq vaxtı uzatmağa, üçüncü tərəflərin arxasında gizlənməyi seçib. Ermənistan bilməlidir ki, XXI əsrdə güc və təzyiq yolu ilə regionda mövqe əldə etmək mümkünsüzdür. Azərbaycan öz suverenliyini bərpa edib. Rəsmi İrəvan bu reallıqla barışmalıdır".
Fatimə Nəbiyeva
20:20 01.07.2025
Oxunuş sayı: 23057
