Azərbaycanla Ermənistan arasında sülh gündəmdə: "Cənubi Qafqazın geoiqtisadi əhəmiyyəti artır"
Avropa İttifaqının (Aİ) xarici işlər və təhlükəsizlik siyasəti üzrə ali nümayəndəsi Kaya Kallas bu gün İrəvanda Ermənistanın xarici işlər naziri Ararat Mirzoyanla birgə mətbuat konfransında bildirib ki, Azərbaycan və Ermənistan arasında münasibətlərin normallaşması Cənubi Qafqaz regionunda davamlı sülhə yol aça bilər.
O vurğulayıb ki, Aİ Bakı və İrəvan arasında münasibətlərin normallaşması istiqamətində əldə edilən irəliləyişi yüksək qiymətləndirir.
"Bu gün biz nazir Mirzoyanla Ermənistan-Azərbaycan münasibətlərini də müzakirə etdik. Aİ iki ölkə arasında suverenlik, ərazi bütövlüyü və sərhədlərin toxunulmazlığına hörmət əsasında münasibətlərin normallaşmasını qətiyyətlə dəstəkləməyə davam edir. Bu üç prinsipə alternativ yoxdur. Biz ikitərəfli münasibətlərin normallaşması istiqamətində əldə edilən irəliləyiş bizi sevindirir və ruhlandırır, çünki Ermənistan və Azərbaycan arasında münasibətlərin yaxşılaşması regionda davamlı sülhə yol aça bilər", - K.Kallas qeyd edib.
Cənubi Qafqaz regionu uzun illərdir davam edən siyasi qarşıdurmalar, etnik münaqişələr və geosiyasi maraqların toqquşma nöqtəsi kimi tanınır. Xüsusilə Azərbaycanla Ermənistan arasında baş vermiş müharibələr və davam edən ziddiyyətlər regionda sabitlik və inkişaf proseslərini ciddi şəkildə ləngidib. Lakin son illərdə iki ölkə arasında münasibətlərin tənzimlənməsi istiqamətində atılan addımlar yeni bir mərhələnin başlaya biləcəyinə ümid yaradır. Bu proses yalnız ikitərəfli münasibətlər üçün deyil, bütövlükdə regionun gələcək taleyi baxımından da mühüm əhəmiyyət kəsb edir.
Bu barədə Crossmedia.az-a danışan politoloq Turan Rzayev bildirib ki, Bakı ilə İrəvan arasında münasibətlərin normallaşması Cənubi Qafqaz regionunda dərin və əhəmiyyətli geosiyasi dəyişikliklərə yol aça bilər: "İlk növbədə, onilliklər ərzində davam edən qarşıdurma və qarşılıqlı düşmənçilik aradan qalxar, bunun nəticəsində regionda daha sabit, təhlükəsizlik baxımından proqnozlaşdırıla bilən və uzunmüddətli sabitliyə əsaslanan bir mühit formalaşar. Eyni zamanda, bölgədə iqtisadi inteqrasiyanın səviyyəsi artar, qarşılıqlı ticarət və əməkdaşlıq genişlənər, yeni nəqliyyat və enerji dəhlizləri meydana gələr. Bu isə həm regional, həm də beynəlxalq səviyyədə geosiyasi güc mərkəzlərinin yenidən formalaşmasına və güc balansının dəyişməsinə səbəb ola bilər. Mümkün sülh sazişinin imzalanması nəqliyyat infrastrukturunun genişlənməsinə, mühüm regional layihələrin icrasına və əməkdaşlıq mexanizmlərinin qurulmasına ciddi şəkildə təkan verər".
Analitik qeyd edib ki, Azərbaycan, Ermənistan və Gürcüstan arasında yük və sərnişin daşımalarının sadələşdirilməsi və liberallaşdırılması Cənubi Qafqazın tranzit-logistika potensialını əhəmiyyətli dərəcədə artırar: "Bu isə Avropa ilə Asiya arasında strateji əlaqə funksiyasını yerinə yetirəcək yeni nəqliyyat qovşaqlarının yaranmasına səbəb olar. Beləliklə, region beynəlxalq nəqliyyat və ticarət şəbəkəsində daha mühüm mövqe qazanar. Nəticə etibarilə, regional ticarət əhəmiyyətli dərəcədə canlanar, xarici investisiyalar üçün əlverişli və sabit mühit formalaşar, iqtisadi əməkdaşlıq daha da genişlənər və dərinləşər. Bütün bu proseslər isə Cənubi Qafqazın geoiqtisadi əhəmiyyətini artırmaqla yanaşı, onun qlobal enerji və nəqliyyat strategiyalarında mühüm bir aktora çevrilməsinə zəmin yaradar".
Ləman Həsənova
18:44 30.06.2025
Oxunuş sayı: 13190
