Ermənistanda iqtidar üçün təhlükə: "Azərbaycan milli maraqlarına uyğun şəkildə istifadə etməli və..."
II Qareginin iqamətgahında Acapaxyanın saxlanılması üzrə əməliyyat davam edir.
Ermənistan Milli Təhlükəsizlik Xidməti arxiyepiskop Mikael Acapaxyanı II Qareginin iqamətgahının yerləşdiyi Eçmiədzindəki monastırdan apara bilməyib.
Monastır yaxınlığında vəziyyət gərgin olaraq qalır. Güc strukturları ilə dindarlar arasında vaxtaşırı toqquşmalar baş verir.
Ermənistanda davam edən daxili siyasi qarşıdurma barədə Crossmedia.az-a danışan politoloq Əhəd Məmmədli son dövrlərdə Ermənistanda müşahidə edilən siyasi proseslərin ölkə daxilində dərinləşən qarşıdurmalar fonunda inkişaf etdiyini bildirib: "Ermənistan prezidenti Nikol Paşinyan demək olar ki, siyasi səhnədəki bütün əsas rəqiblərini neytrallaşdırmağa nail olub. O, istər Qarabağ klanını, istərsə də Rusiya yönümlü qüvvələri siyasi manevrlərlə zəiflədib. Eyni zamanda, Ermənistan ordusunun struktur baxımından zəif duruma düşməsi və Rusiya ilə münasibətlərin kəskin şəkildə gərginləşməsi ölkənin müdafiə qabiliyyətini daha da zədələyib. Ermənistanda tarixi olaraq siyasi və ictimai institut funksiyası daşıyan əsas təsisat kilsə olmuşdur. Xristian kimliyinin daşıyıcısı olan Ermənistan Apostol Kilsəsi uzun müddət milli birliyin və siyasi şüurun formalaşmasında əsas dayaqlardan biri kimi çıxış edib. Yaxın keçmişdə kilsə daxilində Paşinyana qarşı ilk ciddi mövqe Ararat yepiskopu Baqrat Qalstanyan tərəfindən sərgiləndi. Lakin o, hər nə qədər cəmiyyətin müəyyən hissəsində simpatiya qazansa da, genişmiqyaslı siyasi dəstək əldə edə bilmədi. Nəticədə onun rəhbərliyi ilə keçirilən aksiyalar gözlənilən təsiri yaratmadı və Qalstanyan faktiki olaraq neytrallaşdırıldı.
Tarix boyu erməni xalqının diaspor şəraitində sağ qalmasında və kimliyini qorumasında kilsənin rolu danılmazdır. Bu baxımdan, Paşinyan hökumətinin kilsə ilə qarşıdurması erməni dövlətçiliyinin tarixi-sosioloji təməl sütunlarını zəiflədə bilər. Analoji vəziyyət yəhudi xalqında sinaqoqların funksiyası ilə müqayisə oluna bilər. Hər iki halda dini ibadət yerləri yalnız mənəvi mərkəz deyil, eyni zamanda sosial, siyasi və ticari əlaqələrin formalaşdığı məkan funksiyasını yerinə yetirmişdir. Məhz bu baxımdan, Paşinyanın kilsəyə qarşı apardığı siyasət erməni cəmiyyətində mövcud olan tarixi dayaqların aşınmasına səbəb olur. Bu proses uzunmüddətli dövrdə Ermənistanda dövlətçilik institutlarının zəifləməsinə və daxili sabitliyin pozulmasına gətirib çıxara bilər. Azərbaycanın strateji maraqları kontekstində bu cür daxili destabilizasiya müəyyən üstünlüklər yarada bilər"
O bildirib ki, xüsusilə, cari mərhələdə Zəngəzur dəhlizinin açılması məsələsi aktual olaraq qalır: "Ermənistan daxilindəki siyasi qarışıqlıq və zəif liderlik bu prosesin Azərbaycanın şərtləri əsasında həyata keçirilməsi üçün əlverişli şərait yaradır. Buna görə də Azərbaycan öz milli maraqlarına uyğun olaraq, bu imkanlardan rasional şəkildə istifadə etməli və prosesin sürətlənməsinə çalışmalıdır".
Ləman Həsənova
14:25 27.06.2025
Oxunuş sayı: 805
