Kremlin narahatlıq siqnalı: Rusiya Ermənistanı hələ də öz orbitində görmək istəyir
Rusiya Baş nazirinin müavini Aleksey Overçuk bildirib ki, Ermənistanın Avropa İttifaqına inteqrasiya cəhdləri Moskvanı narahat edir. Onun sözlərinə görə, bu kurs gələcəkdə Ermənistanın hava məkanının Rusiya üçün bağlanması ilə nəticələnə bilər.
Qeyd edək ki, Aİ son aylarda Ermənistanla siyasi və təhlükəsizlik sahəsində əməkdaşlığı gücləndirib. Brüssel Ermənistana maliyyə və texniki dəstək göstərir, ölkədə müşahidə missiyası fəaliyyət göstərir. Bu isə Moskvanın Cənubi Qafqazda təsirinin zəifləməsi kimi qiymətləndirilir.
Crossmedia.az xəbər verir ki , bu fikirləri Cross Media Təhlil Mərkəzinin analitiki, Crossmedia.az Analitik İnformasiya Portalının Baş redaktoru, siyasi şərhçi Mübariz Göyüşlü Sherg.az-a bildirib. O , qeyd edib ki, Rusiya rəsmilərinin Ermənistanla bağlı verdiyi açıqlamalar artıq əvvəlki qədər ciddi qəbul edilmir:
"Bu bəyanatlar, əsasən, Ermənistan hakimiyyətinə yönəlmiş siyasi təzyiq və hədə-qorxu xarakteri daşıyır. Rusiya tərəfi görünür hələ də Ermənistanın hər hansı geosiyasi qərarını Moskva ilə razılaşdırmalı olduğunu düşünür. Əgər Kreml bu məsələdə həqiqətən narahatdırsa, o zaman sadəcə ritorika ilə kifayətlənməməli, daha sərt və açıq mövqe nümayiş etdirməlidir. Ermənistanın Avropa İttifaqına inteqrasiya istiqamətində cəhdləri mövcuddur, lakin bu prosesin qısa və ya orta müddətdə real nəticə verəcəyi hələlik inandırıcı görünmür. Bu, həm daxili siyasi qeyri-sabitlik, həm də regionda davam edən geosiyasi gərginliklə bağlıdır".
17:07 20.06.2025
Oxunuş sayı: 642
