Cənubi Qafqaz
Paşinyan üçün daxili təhlükə: Karapetyan qalmaqalı hakimiyyət böhranını dərinləşdirir
Ermənistanda daxili siyasi gərginlik səngimək bilmir. Baş nazir Nikol Paşinyanın “sülh gündəliyi” və Qərbə inteqrasiya kursu fonunda ölkə daxilində siyasi qarşıdurmalar daha da dərinləşir. Ermənistan Apostol Kilsəsi ilə hökumət arasında münasibətlər son aylarda açıq qarşıdurma mərhələsinə keçib. Kilsə rəhbərliyi Paşinyanı milli maraqlara xəyanətdə ittiham edir və etiraz aksiyalarına dəstək verir.
Eyni zamanda, Rusiyaya yaxın çevrələr də hökumətin hazırkı siyasətindən narazılıqlarını açıq şəkildə ifadə edirlər. Bu narazılıqlar fonunda Ermənistan siyasi elitası daxilində də parçalanma və ziddiyyətlər özünü göstərməkdədir.
Son olaraq, Ermənistan Milli Təhlükəsizlik Xidmətinin (MTX) direktoru Armen Abazyan erməni əsilli, Rusiyada yaşayan iş adamı Samvel Karapetyanın həbsi məsələsində mövqeyinə görə vəzifədən azad edilib. Məlumata görə, Abazyan baş nazirə Karapetyanın həbsi üçün hüquqi əsasların olmadığını bildirib. Buna baxmayaraq, iş adamı sonradan Daxili İşlər Nazirliyinin əməkdaşları tərəfindən saxlanılıb.
Mövzuyla bağlı Crossmedia.az-a danışan politoloq Tofiq Abbasov bildirib ki, Samvel Karapetyan Rusiyada böyük kapitalla tanınan və iri taksi şirkətlərindən birinin rəhbəridir. Onun təşəbbüsü ilə Moskvada yaşayan erməni əsilli iş adamları və nüfuzlu şəxslərin iştirakı ilə geniş tərkibli tədbir təşkil olunub. Formal olaraq konfrans kimi təqdim edilən bu görüş əslində Paşinyan hakimiyyətinə qarşı yönəlmiş müxalif erməni qüvvələrinin toplantısı olub. Toplantının əsas müzakirə mövzusu isə Ermənistan hökumətinin devrilməsi məsələsi idi.
Politoloq qeyd edib ki, tədbirdə iştirak edənlər arasında Rusiyadakı Erməni İttifaqının rəhbəri Ara Abramyan da yer alıb.
Abbasovun sözlərinə görə, o, yüksək intellekt səviyyəsinə malik olmasa da, maliyyə imkanları sayəsində önə çıxan bir fiqurdur. Müxtəlif ölkələrdə həyata keçirilən maliyyə əməliyyatları, xüsusən də “yuma” üsulları vasitəsilə qazanc əldə etmək bu çevrələrin əsas fəaliyyət istiqamətlərindəndir. Karapetyan da həmin tədbirdə iştirak edən əsas şəxslərdən biri olub.
T. Abbasov bildirib ki, Karapetyan Ermənistana qayıtdıqdan sonra hava limanında təhlükəsizlik orqanları tərəfindən saxlanılıb və təxminən beş saat dindirilib. Daha sonra sərbəst buraxılan Karapetyan mətbuat nümayəndələri ilə görüşündə ölkənin ağır vəziyyətdə olduğunu bildirib. O, bu vəziyyətin məsuliyyətini bilavasitə Baş nazir Nikol Paşinyan və onun komandasının üzərinə yıxıb və hakimiyyətin dəyişməsinin zəruri olduğunu vurğulayıb.
Abbasovun sözlərinə görə, Paşinyan əleyhinə formalaşan bu şəbəkə artıq hökumətə qarşı açıq meydan oxumaqdadır. Digər tərəfdən, Rusiya da Ermənistan rəhbərliyinin siyasi kursundan narazılığını dolaylı yollarla nümayiş etdirir. Bu kontekstdə Karapetyanın fəaliyyəti artıq İrəvan tərəfindən ciddi şəkildə nəzarətə götürülüb.
Politoloq əlavə edib ki, qarşıdan gələn parlament seçkiləri 2025-ci il iyunun 7-nə təyin olunub və bu proses fonunda ölkədə siyasi mübarizə daha da kəskinləşib.
Belə şəraitdə Karapetyanın həbsi Ermənistan hökumətinin əsas prioritetlərindən birinə çevrilib. Əgər Milli Təhlükəsizlik Xidmətinin rəhbəri onun həbsi üçün hüquqi əsasların olmadığını bəyan edərək geri çəkilibsə, bu, ya onun Karapetyanla müəyyən əlaqələrinin olduğuna, ya da iqtidar daxilində parçalanmalara işarə edir.
“Bu proses, eyni zamanda Paşinyan hökumətinə daxildən imic zərbəsi vurmaq və siyasi mövqelərini sarsıtmaq məqsədi daşıya bilər”, – deyə politoloq fikrini yekunlaşdırıb.
Aybəniz Səfərova
14:10 18.06.2025
Oxunuş sayı: 12862
