Ermənilər özlərindən mif yaratmağı və ona inanmağı xoşlayırlar - RƏY
Bütün ermənilərin katolikosu II Qaregin son günlərdə iki dəfə Azərbaycana qarşı ərazi iddiaları irəli sürüb və Qarabağda baş verənləri "etnik təmizləmə" adlandırıb. Onun ilk çıxışı İsveçrənin Bern şəhərində keçirilən beynəlxalq konfransda olub. "Dini etiqad azadlığı: Arsax/Dağlıq Qarabağda erməni mənəvi, mədəni və tarixi irsinin qorunması" mövzusunda təşkil olunan bu tədbirdə II Qaregin Azərbaycanın Türkiyənin hərbi dəstəyi ilə "təcavüz və cinayətlər" törətdiyini iddia edib və bunun nəticəsində erməni xalqının "Arsax"da müharibə və "etnik təmizləmə" yaşadığını bildirib.
İkinci çıxışı isə mayın 28-də Sərdarabad yaxınlığında erməni qoşunlarının türk ordusu üzərində qələbəsinə həsr olunmuş abidə önündə baş verib. Burada II Qaregin bir daha "Arsax"dan bəhs edərək erməni xalqının artıq qalib gəldiyini və yenə də qalib gələ biləcəyini vurğulayıb.
Mövzu ilə bağlı Crossmedia.az-a açıqlama verən politoloq Oqtay Qasımov ilk olaraq bildirib ki, erməni cəmiyyətində narsist və millətçi düşüncənin kök salmasında erməni kilsəsinin mühüm rolu var:
“Faktiki olaraq, erməni kilsəsi erməni cəmiyyəti üzərində dominant mövqeyə malikdir və eyni zamanda erməni terrorizminin əsas dəstəkçisi, ilhamvericisi rolunda çıxış edən qüvvədir. Ümumiyyətlə, Ermənistan daxilində erməni kilsəsinin hökumətlərə ciddi təzyiqlər etmək imkanını müşahidə etmişik. Ermənistanın müstəqillik əldə etdiyi dövrdə erməni kilsəsi və erməni hökumətləri birgə Azərbaycan ərazilərinin işğalında iştirak ediblər. 44 günlük müharibədən sonra Paşinyan hakimiyyəti ilə erməni kilsəsi arasında münasibətlərdə gərginliklər yaşanmağa başlayıb. Bunun səbəbi erməni kilsəsinin davamlı şəkildə erməni cəmiyyətini revanşa səsləməsi və hökumətin sülh danışıqlarında iştirakına etiraz etməsidir. Keçən il erməni kilsəsi tərəfindən növbəti həmlənin şahidi olduq. Belə ki, keşiş Baqratın rəhbərlik etdiyi hərəkat birbaşa kilsə tərəfindən, o cümlədən Qarabağ canisi, Qarabağ klanının əsas nümayəndəsi Koçaryan və digərləri tərəfindən yönləndirilirdi. Paşinyan hakimiyyəti isə hazırda kilsə ilə ciddi gərginlik yaşayır və siyasi mübarizə davam edir”.
Politoloqun sözlərinə görə, katalikosun həm İsveçrədə, həm də Sərdarabaddakı çıxışına gəldikdə, burada yeni bir mövqe yoxdur:
“Qeyd etdiyim kimi, erməni katolikosları hər zaman erməni terrorizmini dəstəkləyiblər. Bu, 100 il, 200 il əvvəl də belə olub. Həm Osmanlı Türkiyəsi ərazisində, həm Azərbaycan torpaqlarında, həm də Qafqazda Azərbaycan türklərinə və müsəlmanlara qarşı terrorizmin əsas ilhamverici qaynağı məhz erməni kilsəsi və erməni keşişləri, o cümlədən katolikosları olub. Bu fikirlər erməni kilsəsi tərəfindən müəyyən edilmiş təbliğat tezisləridir və bu proses davam edəcək. Bundan sonra da erməni kilsəsinin ifşasına nail olmaq, onun terrorizmin ideoloji və mənəvi mərkəzi olduğunu göstərmək əsas məqsəd olmalıdır. Eyni zamanda, Ermənistanın və erməni terrorizminin əleyhimizə olan mümkün addımlarına qarşı hazırlıqlı olmaq vacibdir.
Bu çıxış, şübhəsiz ki, beynəlxalq auditoriyalardan istifadə etməklə səsləndirilən fikirlərdir. Əslində, katalikosun bu fikirləri Ermənistan hökumətinin bir çox nümayəndələrinin mövqeyi ilə üst-üstə düşür. Katalikos aktiv revanşist və bu revanşizminin bayraqdarı rolunda çıxış edirsə, hökumət üzvlərinin bir çoxu passiv revanşist rolunu davam etdirirlər. Sərdarabaddakı çıxışında “Qarabağda ermənilərin Türkiyənin dəstəyi ilə qovulduğunu” iddia etməsi, “Ermənistan ordusunun məğlubedilməz bir güc olduğu” və “Azərbaycan yalnız Türkiyənin köməyi ilə onu məğlub etdiyi” fikirləri yalnız yaratdıqları miflərin davamıdır. Ermənilərin qalib olduqlarını iddia etməsi isə ironikdir. Tarixdə Sərdarabadda Osmanlı ordusunun bir batalyonuna qarşı erməni korpusunun müqavimətindən söhbət gedir və erməni hərb tarixində yalnız bu hadisənin üzərində dayanılır. Hansı dünya hərb tarixində bu savaş adi döyüşlərdən biri kimi qəbul olunur. Sadəcə olaraq, ermənilər özlərindən mif yaratmağı və ona inanmağı xoşlayırlar. “Biz qalib gəlmişik” fikri revanşistləri ruhlandırmaq, onları ayaqda tutmaq və kilsənin ətrafında birləşdirmək məqsədi güdür”.
Nəzrin Salmanova
15:20 03.06.2025
Oxunuş sayı: 9186
