Azərbaycanla müharibə Ermənistan üçün fəlakət ssenarisidir - AÇIQLAMA
Azərbaycan və Ermənistan arasında sülh sazişi ilə bağlı danışıqlar son mərhələyə yaxınlaşır. Hər iki ölkə sazişin imzalanma tarixini razılaşdırmaq üçün ikitərəfli məsləhətləşmələr aparır. Sazişin əsas müddəaları arasında Ermənistanın Konstitusiyasında Azərbaycana qarşı ərazi iddialarının aradan qaldırılması və Minsk qrupunun tamamilə ləğvi yer alır.
Qeyd edək ki, Ermənistanın Baş naziri Nikol Paşinyan bildirib ki, bütün təxribatlara baxmayaraq, Ermənistanla Azərbaycan arasında müharibə yox, sülh olacaq.
Mövzu ilə bağlı Crossmedia.az-a açıqlama verən politoloq Elçin Xalidbəyli ilk olaraq bildirib ki, Paşinyan hakimiyyəti Ermənistanda hər kəsdən yaxşı bilir ki, Azərbaycanla müharibə Ermənistan üçün fəlakət ssenarisidir:
“Əgər bir daha savaş başlayarsa, bu, Ermənistana baha başa gələ bilər. Hətta bu, Ermənistana dövlətçiliyin itirilməsi ilə nəticələnə bilər. Ona görə də, təbii ki, Paşinyan hakimiyyəti ümumi anlamda savaşa o qədər də maraqlı deyil. Ancaq Ermənistanın Azərbaycana münasibəti elə formalaşdırılıb ki, bu qondarma, uydurma dövlət Azərbaycanla mütləq müharibə şəraitində yaşamağa vərdiş edib. Digər tərəfdən, Ermənistanda radikal revanşist müxalif düşərgə də sülh sazişinə yox, müharibəyə üstünlük verdiyini açıq şəkildə göstərir. Bu qrup birbaşa Rusiya kəşfiyyatı tərəfindən idarə olunur və Rusiyadan gələn təlimatlar əsasında davranır. Ermənistanda gələn il seçkilər keçiriləcəyindən, Baş nazir Nikol Paşinyan da anlayır ki, Ermənistan üçün taleyüklü bir dövr yaxınlaşır. Rusiya Ermənistanda dövlət çevrilişi etməkdə maraqlıdır və bu məqsədlə də revanşist radikal siyasi qüvvələrdən istifadə edə bilər. Eyni zamanda, 30 ilə yaxın Azərbaycanda separatçılıqla məşğul olan erməni qruplaşması hazırda Ermənistan üçün ciddi problem yaradır. Rusiyanın nəzarətində olan bu silahlı qruplaşmada çoxlu sayda silah sursat var. Bu silah sursatdan Ermənistanda siyasi məqsədlərlə istifadə edilə bilər”.
Politoloqun sözlərinə görə bu, vətəndaş müharibəsinə qədər inkişaf edə biləcək bir prosesdir:
“Əgər bunlar da baş verməsə, Paşinyan hakimiyyəti xarici kəşfiyyat orqanlarının təlimatlarına uyğun hərbi təxribatların baş verə biləcəyindən narahatdır. Belə bir ssenari Ermənistan-Azərbaycan arasında yeni müharibəyə yol aça bilər. Paşinyanın bu ehtimalı qətiyyən istisna deyil. Bu baxımdan, Ermənistanda əslində səhnə arxasında bir savaşa hazırlıq prosesi də müşahidə olunur. Paşinyan və onun yaxın ətrafı anlayır ki, savaş Ermənistan üçün təhlükəli seçimdir. Seçim onların özlərindən asılıdır. Əgər yeni müharibə baş verərsə, döyüşlər artıq Azərbaycan ərazilərində deyil, Ermənistan ərazisində yaşanacaq. Çünki bu günün Azərbaycanı 90-cı illərin Azərbaycanı deyil – güclü, öz torpaqlarını qoruya bilən və hərbi təcavüzə sərt cavab verməyə hazır olan bir Azərbaycan mövcuddur. Bu reallığı Ermənistanın qəbul etməsi qaçılmazdır”.
Nəzrin Salmanova
14:38 30.05.2025
Oxunuş sayı: 14262
