"Ermənistan referendum keçirib Konstitusiyanı dəyişməlidir" - Politoloq
Ermənistanın baş naziri Nikol Paşinyan Azərbaycanla sülh sazişi barədə diqqətçəkən açıqlama verib. O bildirib ki, sənəd Konstitusiya Məhkəməsinə təqdim ediləcək. Əgər məhkəmə sazişi təsdiqləməzsə, əsas qanuna dəyişiklik təşəbbüsü ilə çıxış edəcək. Paşinyan bu addımı sülh imkanını əldən verməmək üçün vacib sayır. Lakin bu məsələnin reallaşma ehtimalı nə dərəcədə yüksəkdir?
Mövzu ilə bağlı Crossmedia.az-a açıqlama verən Politoloq Samir Hümbətov bildirib ki, Paşinyanın “əvvəlcə sülh sazişini imzalayaq, əgər nəticə verməsə, sonra referenduma gedək” yanaşması risklidir və prosesləri şansa buraxmaq deməkdir. S. Hümbətovun sözlərinə görə, bu cür mövqe Ermənistan üçün yeni siyasi və hüquqi qeyri-müəyyənliklər yarada bilər. Politoloq Ermənistanda hakimiyyət dəyişikliyi ehtimalının da mümkünlüyünü xatırladıb: “Ermənistanda hakimiyyət dəyişikliyi də ola bilər. Yəni bu gedişat ölkədə daxili sabitliyi poza bilər. Ən doğru qərar kimi onu hesab edirəm ki, birinci referendumu keçirmək lazımdır. Yəni konstitusiyaya dəyişiklik edilməlidir ki, Qarabağ Azərbaycanın ayrılmaz hissəsi kimi tanınsın. Sonrakı mərhələdə isə sülh sazişi imzalana bilər”.
Samir Hümbətov əlavə edib ki, hazırda Ermənistanın əsas qanununda sülh sazişinə uyğun dəyişikliklər edilməyibsə, bu sənədin imzalanması və ya Konstitusiya Məhkəməsinə təqdim olunması real nəticə verməyəcək. O, Robert Koçaryanın son açıqlamalarına da diqqət çəkərək vurğulayıb ki, əgər Ermənistanda hakimiyyət dəyişikliyi baş versə, sülh sazişi əhəmiyyətini itirəcək.
Politoloq vurğulayıb ki, Paşinyanın təklif etdiyi yol inandırıcı görünmür: "Mən Paşinyanın dediyini çox da real qəbul etmirəm. Tutaq ki, Konstitusiya Məhkəməsi sazişi tanımadı, bəs nə edəcək? Referenduma gedəcək? Onun üzərinə qoyulacaq təzyiqlərin, aparılacaq təbliğatın nəticəsi hansı yerə qədər Ermənistanı düzgün istiqamətdə saxlaya biləcək? Bu da ciddi suallar doğurur”.
S. Hümbətovun fikrincə, ya vaxtında konstitusiya dəyişdirilməlidir, ya da bu yanaşma Ermənistana əks nəticələr verə bilər. Onun qənaətincə, Ermənistan bəzi məsələlərdə öz öhdəliklərini aydın şəkildə ifadə etməlidir. Əks təqdirdə sülh sazişindən gözlənilən fayda əldə edilməyəcək.
Fatimə Nəbiyeva
13:12 26.05.2025
Oxunuş sayı: 13464
