“Türkiyə, Ermənistan, Azərbaycan birgə əməkdaşlıq platforması qurulsun” - TƏKLİF
Ermənistan son zamanlar Türkiyə ilə münasibətlərini yaxşılaşdırmaq məqsədilə bir sıra mühüm addımlar atır.
Ermənistanın xarici işlər naziri Ararat Mirzoyan, Hindistanda keçirilən Dünya İşləri Şurasında verdiyi bəyanatında bildirib ki, Ermənistan və Türkiyə arasında əlaqələrin inkişafı regional sabitlik və sülhün təmin edilməsi baxımından çox vacibdir.
Nazir iki ölkə arasında diplomatik əlaqələrin qurulması və sərhədlərin açılması prosesinin regional iqtisadiyyat və təhlükəsizlik üçün müsbət təsir göstərəcəyini vurğulayıb.
Mirzoyan Ermənistanın Türkiyə ilə dialoqu davam etdirdiyini və bu məqsədlə əməli addımlar atıldığını qeyd edib. O, Ani körpüsünün birgə bərpası ilə bağlı razılaşmanın da əldə edildiyini açıqlayıb. Bu, hər iki ölkə arasında nəqliyyat əlaqələrinin bərpası və əməkdaşlığın gücləndirilməsi baxımından önəmli bir addımdır. Eyni zamanda, Mirzoyan birbaşa hava nəqliyyatı və yük daşınması məsələlərində artıq qərarların alındığını və diplomatik pasportlara sahib şəxslər üçün sərhədin açılması barədə də razılaşma əldə edildiyini bildirib.
Ermənistanın xarici işlər naziri bu razılaşmaların həyata keçirilməsinin yalnız Ermənistan və Türkiyə üçün deyil, bütün Cənubi Qafqaz regionu üçün faydalı olacağına inanır. Sərhədlərin açılması və nəqliyyat yollarının bərpa edilməsi, regional iqtisadi inteqrasiyanı artıraraq, sülh və sabitliyi möhkəmləndirəcək. Bu prosesin uzun müddət davam edən gərginlikləri aradan qaldıraraq, iki ölkə arasında yeni bir əməkdaşlıq dövrü açacağı gözlənilir.
Bu barədə Crossmedia.az-a açıqlamasında Türkiyənin Qafqaz Strateji Araşdırmalar Mərkəzinin başqanı, politoloq Hasan Oktay bildirib ki, əgər iki il əvvəl heç bir ilkin şərt olmadan lazımi addımlar atılsaydı, Rusiya Ukrayna ilə məşğul olarkən proses artıq qəbul edilmiş olardı: “La
kin bu vaxta qədər gözləmək, bundan sonra Rusiyanın ABŞ-lə mümkün razılaşmasına əsaslanaraq bölgə ilə bağlı yeni planların gündəmə gələ biləcəyini göstərir.
Hər keçən gün Cənubi Qafqazda sülhə nail olmaq çətinləşir. Rusiyanın bu məsələdə razılıq verməyəcəyi ehtimal olunduğundan, bölgədə təhlükəsizlik və əməkdaşlığın təmin olunması üçün Türkiyə, Ermənistan və Azərbaycanın birgə əməkdaşlıq platformasının – “üçtərəfli divarın” tez bir zamanda formalaşdırılması vacibdir”.
Fidan Xəlilova
18:59 11.03.2025
Oxunuş sayı: 15777
