Azərbaycan regionda qurulan təhlükəli oyunlardan xəbərdardır: "Cavab veriləcək"
Ermənistan xarici işlər naziri Ararat Mirzoyan martın 9-da Hindistana rəsmi səfər edib. Ümumiyyətlə, son zamanlar Ermənistan və Hindistan arasındakı siyasi və hərbi yaxınlaşma regionda diqqət çəkən mövzulardan birinə çevrilib.
Analitiklərin fikrincə, Hindistanın Ermənistanla müttəfiqlik münasibətləri qurması təkcə ikitərəfli əməkdaşlıqdan ibarət deyil, həm də bölgədəki geosiyasi balansı dəyişmək məqsədi daşıyır.
İkitərəfli münasibətlərin perspektivi və regiona təsiri barədə Crossmedia.az-a açıqlama verən politoloq Tofiq Abbasovun sözlərinə görə Hindistanla müttəfiqlik münasibəti Ermənistanın ürəyincədir: "Amma Dehlinin bu münasibətlərlə bağlı öz planları var. Ümumiyyətlə, tərəflərin yaxınlaşmasının bir neçə əsas səbəbi var. Bunlardan biri Azərbaycan, Türkiyə və Pakistan üçlüyünün Hindistan müəyyən çətinliklər yaratmasıdır. Digər tərəfdən, Hindistan bölgədəki kommunikasiyalarla bağlı uzunmüddətli planlarını həyata keçirmək üçün Ermənistanı vasitə kimi görür. Hindistanın İran-Ermənistan-Gürcüstan-Qara dəniz marşrutu vasitəsilə Avropaya çıxışı təmin etmək istəyi də bu siyasətin bir hissəsi kimi qiymətləndirilir”
Siyasi analitikin sözlərinə görə, Ermənistanın bu istiqamətdə atdığı addımlarının arxasında siyasi manipulasiya edici məqamlar dayanır: "Ermənistanın özünü sülh prosesindən kənarlaşdırması və münaqişəli siyasət yürütməsi onun regionda yeni qarşıdurma kampaniyası yaratmaq məqsədini güdə biləcəyini göstərir.
Hindistan hərbi sənayesinin inkişafı, yeni silah növlərinin istehsalı ilə bağlı Ermənistanı sınaq meydanına çevirmək ehtimalı yüksəkdir. Hətta Qərb dövlətləri, xüsusilə ABŞ Ermənistanı siyasi layihələr üçün alət kimi istifadə edir.
Azərbaycan baş verən bütün proseslərdən xəbərdardır. Rəsmi Bakı istənilən təhlükəli siyasi addıma adekvat cavab vermək imkanına sahib olduğunu bildirib".
Mədinə Cəlilova
17:04 10.03.2025
Oxunuş sayı: 911
