Qonşuda siyasi "zəlzələ": "Pezeşkianı işləməyə qoymurlar"
İran mənbələrinin verdiyi məlumata görə, İran Prezidenti Məsud Pezeşkian istefa ərizəsini ölkənin ali dini lideri Əli Xameneiyə təqdim edib. Lakin Xamenei bu təklifi qəti şəkildə rədd edərək, prezidentin istefasının İranı həm beynəlxalq ictimaiyyətin, həm də öz xalqının gözündə zəiflədəcəyini bildirib. Pezeşkianın istefa qərarı, ölkədə maliyyə nazirinin və vitse-prezidentin istefaları ilə kəskinləşən siyasi böhran fonunda atılıb. Bu hadisələr hökumət daxilində gərginliyi artırıb və ölkənin gələcək kursu ilə bağlı geniş müzakirələrə səbəb olub.
Ölkə daxilində baş verən proseslərlə bağlı Crossmedia.az-a danışan politoloq Elxan Şahinoğlu bildirib ki, Pezeşkiana işləməyə imkan vermirlər: "Çünki xalqın seçdiyi lider bir neçə mollanın seçdiyi ali dini liderin təsiri altındadır. O, heç bir addım ata bilmir. Onun icazəsi olmadan və parlamentdə iqtisadiyyat naziri təsdiq etmədikdən sonra vəziyyət daha da gərginləşdi. Bundan sonra İran prezidentinin strateji məsələlər üzrə köməkçisi Zərif də istefa verdi və böyük ehtimalla ali dini lider prezidentin istefasını qəbul etməyəcək çünki bu, ölkədəki gərginliyi daha da artırar".
E.Şahinoğlu bildirib ki, mövcdud problemlərin aradan qaldırılması üçün bir çarə tapılmalıdır, çünki ölkədə ikitirəlik mövcuddur. "Bir tərəfdən seçilən prezident, digər tərəfdən təyin olunan ali dini lider var. Konstitusiyaya görə, ali dini liderin səlahiyyətləri daha yüksəkdir. Prezident islahat apara bilmir və verdiyi vədləri yerinə yetirə bilmir. Bu yalnız Pezeşkian üçün deyil. Yaxın 30 ildə İranda heç biri islahat apara bilməyib".
Politoloq vurğulayıb ki, Pezeşkianın hakimiyyətdə qalıb - qalmamasını hadisələrin gedişatı göstərəcək: "Qərarları ali dini liderin ətrafı verir. Bu isə Pezeşkianın siyasətini həyata keçirməsi üçün ən böyük maneədir".
Xumar Əhmədova
17:00 04.03.2025
Oxunuş sayı: 642
