Ermənilərin Fransadan narazılığı: “Bizi 44 günlük müharibədə satdılar”
“Əgər siz "Dağlıq Qarabağ" hökumətinin tanınması məsələsindən danışırsınızsa, bu, heç vaxt beynəlxalq ictimaiyyət, hətta Ermənistan tərəfindən də tanınmayıb. Üstəlik, Ermənistan Alma-Ata bəyannaməsində Qarabağın Azərbaycanın bir hissəsi olduğunu tanıyıb, çünki o, Sovet Azərbaycanının bölgəsi olub. Ermənistanın 2022-ci ildə Praqada “Dağlıq Qarabağı” Azərbaycanın bir hissəsi kimi tanıdığını iddia edənlər yalan danışırlar”.
Bu sözləri Fransanın Ermənistandakı səfiri Olivye Dekotinyi müsahibəsində deyib.
Fransa kimi anti-Azərbaycan kompaniyası aparan bir dövlətin diplomatından bu cür ifadələr eşitmək müəyyən çaşqınlıqlar yaradır. Avropada və ümumiyyətlə dünyada “Ermənistanın bacısı” kimi tanınan Fransa tanımadığını bildirdiyi “Dağlıq Qarabağ” uğrunda gedən 2020-ci il müharibəsində olduqca böyük canfəşanlıq edirdi. Müharibədən 5 il keçməsinə baxmayaraq, Ermənistanı silahlandırmağa və müharibəyə təhrik etməyə davam edir. Ermənistandakı Fransa səfiri Olivye Dekotinyinin bu sözlərinin altında yatan nəsə varmı? Yaxud səmimidirsə bu sözlər nə məqsədlə deyilib?
Mövzu ilə bağlı politoloq Mütəllim Rəhimli Crossmedia.az-a açıqlama verib: “Fransanın Ermənistandakı səfiri 1991-ci ildə Alma-Ata bəyannaməsində Qarabağın Azərbaycanın tərkib hissəsi kimi tanındığını indi təsadüfən dilə gətirməyib. Bununla səfir Qarabağın itirilməsi ilə bağlı Ermənistan ictimaiyyətində olan qəzəbi və məyusluğu keçmiş Rusiyapərəst hakimiyyətlərin üzərinə qoyur. Bununla da o indiyədək hakimiyyətdə olan üç iqtidarın xalqa yalan danışdığını, onunla səmimi olmadığını göstərmiş oldu. Fransa səfiri Ermənistan Baş naziri Nikol Paşinyanı qoruyur, nəinki həqiqətləri xalqa çatdırır. Son vaxtlar Rusiyanın həm Ukrayna cəbhəsində revanşı, həm də siyasi müstəvidə açıq həmləsi Ermənistan ictimaiyyətinə təsirsiz ötüşmür. Belə vaxtda ermənilərin mənəvi-psixoloji yardıma ehtiyacı var. Fransa onların mənəvi olaraq müdafiəsinə qalxıb və onu tək buraxmaq istəmir. Ermənistanı bu arada siyasi səhnədə güclənən Rusiyaya "yedirtmək" istəmir. Həm də Fransadakı Makron iqtidarı Paşinyan hakimiyyətinə hərbi köməkdən başqa siyasi dəstək də göstərir. Ermənistan ictimaiyyətində belə bir fikir formalaşıb ki, Fransa 44 günlük müharibədə Ermənistanı satdı. İndi səfir bu açıqlaması ilə bildirməyə çalışır ki, Ermənistanın mövqelərini o vaxtkı rəhbərlik satıb”.
Ayhan Ağarzayev
19:22 24.02.2025
Oxunuş sayı: 1022
