“Paşinyan Azərbaycan və Türkiyə ilə münasibətlərin normallaşmasının zəruriliyini etiraf edir”- RƏY
Son illərdə beynəlxalq siyasət arenasında baş verən dəyişikliklər Cənubi Qafqaz regionuna birbaşa təsir göstərməkdədir. Xüsusilə Ermənistanın xarici siyasət kursu və regionda davamlı sülhə nail olmaq üçün atdığı addımlar beynəlxalq qüvvələrin və qonşu dövlətlərin maraq dairəsindədir. Ermənistanın tarixi və geosiyasi mövqeyi onun xarici siyasətinə təsir edir. Eyni zamanda daxili siyasi proseslər də bu məsələdə həlledici rol oynayır. Hazırkı mərhələdə Ermənistan rəhbərliyi müxtəlif çağırışlarla üzləşir və bu çağırışlara uyğun siyasət formalaşdırmağa çalışır.
Ermənistanın xarici siyasətində atdığı addımlar barəsində Crossmedia.az-a açıqlama verən Milli Məclisin deputatı Rizvan Nəbiyevin fikirincə, bir neçə gün öncə Ermənistan baş naziri Nikol Paşinyanın açıqladığı 14 bəndlik layihədə bir neçə məqam diqqət çəkir: “Bunlar konstitusiya dəyişikliyi, regionda sülhün bərqərar olunması və xarici siyasətlə bağlıdır. Paşinyana görə, dövlətin mövcudluğu xalqın öz taleyini müəyyən etməsi üçün ən vacib faktordur, yəni dövlətçilik əsas prinsipdir. Maraqlıdır ki, Ermənistanın birinci prezidenti Ağdamın işğalı günü verdiyi bəyanatda qeyd edirdi ki, ermənilər 600 il ərzində dövlətçiliyə sahib olmayıb. Paşinyanın bu fikri səsləndirməsi isə əldə edilənləri qorumaq cəhdi kimi görünür. Digər bir məsələ isə Paşinyanın qonşulara, o cümlədən şimala və digər istiqamətlərə verdiyi bəyanatdır. O, xarici müdaxilə olmadan sülh əldə etməyin və qonşularla sülh şəraitində yaşamağın vacibliyini vurğulayır. Lakin burada ziddiyyət var. Çünki Avropa İttifaqının müşahidə missiyası Ermənistan ərazisində fəaliyyət göstərir, ölkə isə silahlanmanı davam etdirir. Bununla yanaşı, Paşinyan nəzəri baxımdan qonşularla, xüsusilə Azərbaycan və Türkiyə ilə münasibətlərin normallaşmasının zəruriliyini qəbul edir”.
Deputat qeyd edib ki, Ermənistan dərsliklərindən siyasi həyata qədər zəhərli bir ideologiya hökm sürür və Paşinyan da bu ideologiyanın məhsuludur: “Lakin baş nazirin hazırkı siyasi məsuliyyəti və beynəlxalq proseslər onu bu bəyanatları səsləndirməyə məcbur edir. Ermənistan anlayır ki, regionda həqiqi sülhə nail olmaq üçün xarici müdaxilədən qurtulmaq lazımdır. Halbuki 90-cı illərdə Ermənistan 1 milyard dollar dəyərində pulsuz silah yardımı almış və digər dəstəklərdən faydalanmışdır. Ancaq 30 ildən sonra bu siyasət iflasa uğradı və indi anlayırlar ki, real sülh üçün xarici müdaxilənin minimuma endirilməsi vacibdir. Bu, o demək deyil ki, beynəlxalq aləmdə iki və ya çoxtərəfli münasibətlərin inkişafı olmamalıdır. Amma bunun dominant xarakter daşıması fəlakətə aparıb çıxarır. Paşinyan da cəmiyyəti məhz buna səsləyir”.
R.Nəbiyev bildirib ki, Ermənistan cəmiyyətində türklərə və qonşu dövlətlərə qarşı nifrət ideologiyası hökm sürür: “Bu ideologiyanın daşıyıcıları hazırda parlamentdə və hökumətdə təmsil olunur. Paşinyan bu nifrət dolu ideologiyadan cəmiyyəti qurtarmaq istəyir, lakin bu zaman tələb edən bir prosesdir. Ola bilsin ki, ilin sonuna qədər müəyyən addımlar atılsın. Məsələn, Ermənistan Ali Soveti və Dağlıq Qarabağ Milli Şurasının birləşmək haqqinda 1989-cu ilin 1 dekabrda qəbul etdiyi hüquqa zidd qanunu Ermənistan parlamenti bu gün də ləğv edə bilər. Konstitusiyanın preambulasında edilməli olan dəyişiklik referendum yolu ilə də reallaşdırıla bilər. Ermənistanın sülh müqaviləsini imzalaması üçün fundamental hüquqi əsas lazımdır. Belə hüquqi baza yaradılmalıdır ki, gələcək hakimiyyət dəyişikliyi və ya digər proseslər zamanı kimsə yenidən ərazi iddiaları ilə çıxış etməsin. Bu məsələlər, əslində Azərbaycanın ortaya qoyduğu prinsipial tələblərlə də üst-üstə düşür. Bu tələblər Ermənistan üçün də xilasedici rol oynayır. Çünki davamlı sülh yalnız sağlam və hüquqi əsaslara söykənən siyasətlə mümkün ola bilər".
Xumar Əhmədova
20:19 22.02.2025
Oxunuş sayı: 18887
